امریکی کانگریس کے وفد نے مودی سے ملاقات کی

نئی دہلی،13 نومبر(یواین آئی) امریکی کانگریس کے سینیٹر جان کارنن کی قیادت میں ایک وفد نے آج یہاں وزیراعظم نریندر مودی سے ملاقات کی۔

سینیٹر جان کارنن ہندوستانی اور ہندوستانی نژاد کے امریکیوں سے متعلق سینیٹ گروپ کے شریک بانی اور وائس چیئرمین ہیں ۔وفد کے دیگر ارکان میں سینیٹر مائیکل کریپو، سینیٹر تھامس ٹوبرویل، سینیٹر مائیکل لی، کانگریس مین ٹونی گنزیلز اور جان کیبن ایلگی سینئر شامل تھے۔

وفد نے بڑی آبادی کو درپیش چیلنجوں کے باوجود ہندوستان میں کووڈ کی صورتحال کے بہترین انتظام کی تعریف کی۔ وزیراعظم نے کہا کہ ملک کی جمہوری اقدار پر مبنی عوام کی شرکت نے گزشتہ ایک صدی کی سب سے بدترین وبا سے نمٹنے میں اہم کردار ادا کیا۔

وزیر اعظم نے ہندوستان-امریکہ جامع عالمی اسٹریٹجک پارٹنرشپ کو گہرا کرنے میں امریکی کانگریس کی مسلسل حمایت اور تعمیری کردار کی تعریف کی اور کہا کہ یہ مشترکہ جمہوری اقدار پر مبنی ہے۔
اس دوران باہمی دلچسپی کے علاقائی مسائل بشمول جنوبی ایشیا اور بحرالکاہل کے خطے سے متعلق گرما گرم بات چیت ہوئی۔ وزیراعظم اور وفد کے ارکان نے دونوں اسٹریٹجک شراکت داروں کے درمیان تزویراتی مفادات پر تبادلہ خیال کیا اور عالمی امن و استحکام کو فروغ دینے کے مقصد سے تعاون کو مزید بڑھانے کی خواہش کا اظہار کیا۔

انہوں نے دو طرفہ تعلقات کو بڑھانے اور دہشت گردی، موسمیاتی تبدیلی اور اہم ٹیکنالوجیز کے لیے قابل اعتماد سپلائی چین جیسے عصری عالمی مسائل پر تعاون کو مضبوط بنانے کے امکانات پر تبادلہ خیال کیا۔