اورنگ آباد: تالاب میں ڈوبنے سے پانچ بچیوں کی موت

اورنگ آباد،24 جون ( یواین آئی) مہاراشٹر کے ضلع اورنگ آباد کے گاؤں تمگاؤں واڑی میں ایک تالاب میں ڈوبنے سے پانچ کم عمر بچیوں کی موت ہوگئی ہے۔
پولیس ذرائع نے بتایا کہ منگل کے روز چھ نابالغ بچیاں کپڑے دھونے کے لئے تالاب میں گئیں۔ جس میں سے پانچ لڑکیوں کی تالاب میں ڈوبنے سے موت ہوگئی۔ سبھی کی عمر پانچ سے سات سال بتائی گئی ہے۔

اس واقعے میں زندہ بچ جانے والی ناظمہ آصف پٹھان نے گاؤں والوں کو مدد کے لئے بلایا اور انہیں اس حادثہ کے بارے میں بتایا۔ جس کے بعد پولیس کو اطلاع کردی گئی۔
ذرائع نے بتایا کہ حسن آباد سے پولیس کی ٹیم موقع پر پہنچی اور گاؤں والوں کی مدد سے تالاب سے لاشوں کو نکالا گیا۔
جاں بحق ہونے والی بچیوں کی شناخت اشوبی لطیف پٹھان (6) ، نوبی نواز پٹھان (6) ، الفیدابی گوشن پٹھان (7) ، سانبی اسلم پٹھان (6) اور شوبی اسلم پٹھان (5) کے نام سے ہوئی ہیں۔ سب کا تعلق ایک ہی گاؤں سے تھا۔