سرجری کے بعد متھن چکروتی کی صحت بہتر ہونے لگی

بولی وڈ کے ماضی کے مقبول ہیرو متھن چکرورتی کے حوالے سے گزشتہ ہفتے خبر سامنے آئی تھی کہ ان کے کمر کا درد بڑھ گیا اور انہیں علاج کے لیے امریکا منتقل کردیا گیا۔

متھن چکرورتی کو گزشتہ 9 سال سے کمر اور پیٹھ کے درد کی شکایت تھی اور وہ اس کے علاج کے لیے 2016 میں ہسپتال میں داخل بھی ہوچکے تھے۔

تاہم 28 دسمبر 2018 کو ان کا درد بڑھ گیا اور انہیں ہنگامی بنیادوں پر علاج کے لیے امریکا منتقل کیا گیا تھا۔

تاہم اب خبر سامنے آئی ہے کہ اداکار کا امریکی شہر لاس اینجلس میں آپریشن کردیا گیا، جس کے بعد ان کی صحت بہتر ہو رہی ہے۔

بولی وڈ ہنگامہ نے اپنی رپورٹ میں ذرائع سے بتایا کہ سرجری کے بعد متھن چکرورتی کی صحت بہتر ہو رہی ہے، تاہم وہ تاحال ہسپتال میں داخل ہیں۔

رپورٹ میں بتایا گیا کہ ڈاکٹرز نے اداکار کو چند دن آرام کرنے کے بعد گھر جانے کا گرین سگنل دے دیا ہے، تاہم آئندہ چند روز تک وہ ہسپتال میں ہی رہیں گے۔

اگرچہ خیال کیا جا رہا ہے کہ ایک ماہ کے اندر بھارت پہنچ جائیں گے، تاہم وہ آنے کے بعد کن مصوبوں پر کام کریں گے، اس حوالے سے کچھ بھی کہنا قبل از وقت ہے۔