تاریخ میں پہلی مرتبہ چلتی ریل گاڑی پر طیارہ اتارنےکرحیرت انگیز کارنامہ

استنبول : اطالوی پائلٹ نے ترکیہ میں چلتی ٹرین پر طیارہ اُ تار کر دنیا کو حیران کردیا، رپورٹ کے مطابق 120 کلو میٹر کی رفتار سے دوڑتی مال بردار ٹرین کے کنٹینر پر لینڈنگ ہوا بازی کی تاریخ کا خطرناک ترین اسٹنٹ قرار دیا جارہا ہے۔

پائلٹ ڈاریو کوسٹا نے ناصرف طیارہ کامیابی سے ٹرین پر اُ تارا بلکہ چند سیکنڈز کے بعد وہیں سے دوبارہ اُڑان بھر کر عالمی ریکارڈ بھی بنا دیا ہے۔کسی بھی جہاز کو لینڈ کرنا ہمیشہ ایک چیلنج ہوتا ہے، لیکن تصور کریں کہ آپ کو ایک چھوٹے اور حرکت کرتے ہوئے رن وے پر لینڈنگ کرنا ہو جسے آپ جہاز سے دیکھ نہیں سکتے۔

یہ وہ کیفیت ہے جس میں اطالوی پائلٹ ڈاریو کوسٹا نے اپنے زیوکو ایج 540 جہاز کو ایک حرکت کرتے ہوئی ٹرین کے آخری ڈبے پر لینڈ کرنے کا جرات مندانہ کارنامہ انجام دیا۔

بعدازاں گفتگو کرتے ہوئے کوسٹا نے کہا کہ ٹرین پر لینڈنگ میرے کیریئر کے سب سے مشکل پروجیکٹس میں سے ایک تھا، اس میں سب سے بڑا امتحان یہ تھا کہ ایک بہت چھوٹے اور حرکت کرتے ہوئے رن وے پر اندھے کی طرح لینڈ کرنا سیکھنا تھا اور ایسا صرف ذہنی اور پرواز کی مہارتوں پر انحصار کرتے ہوئے کرنا تھا۔

واضح رہے کہ کوسٹا اور انکی ٹیم اس قسم کی لینڈنگ کی تیاری اور ٹیسٹ 2024 سے کر رہی تھی۔ اسکی وجہ یہ ہے کہ حرکت کرتی ہوئی ٹرین پر ریہرسیل ناممکن تھی، لہٰذا اسکی کامیابی کے لیے ایڈوانسڈ سیمولیشن ٹیکنالوجیز اور کنٹرول گراؤنڈ بیسڈ ریہرسیل بہت اہم تھی۔