ممبئی : بالی ووڈ میں انوپم کھیر کا نام ان چنندہ اداکاروں میں شمار کیا جاتا ہے جنہوں نے تقریبا چار دہائیوں سے اپنی بااثر اداکاری سے ناظرین کے دل میں ایک خاص مقام بنایا ہے ۔
یوم پیدائش 7 مارچ کے موقع پر ۔۔
انوپم کھیر کی پیدائش 07 مارچ 1955 کو شملہ میں ہوئی۔ بچپن سے ہی ان کی خواہش اداکار بننے کی تھی۔ گریجویشن کی تعلیم مکمل کرنے کے بعد انوپم کھیر نے نیشنل اسکول آف ڈرامہ میں داخلہ لے لیا۔
سال 1978 میں نیشنل اسکول سے اداکاری کی تعلیم مکمل کرنے کے بعد وہ تھیٹر سے جڑ گئے ۔ 80 کی دہائی میں اداکار بننے کا خواب لیے ہوئے انہوں نے ممبئی میں قدم رکھا۔ بطور اداکار اس سال 1982 میں آئی فلم آگمن میں کام کرنے کا موقع ملا لیکن فلم کے ناکام ہو جانے کے بعد وہ فلم انڈسٹری میں اپنی شناخت بنانے میں کامیاب نہیں ہو سکے ۔
سال 1984 میں انوپم کھیر کو مہیش بھٹ کی فلم سارانش میں کام کرنے کا موقع ملا۔ اس فلم میں انہوں نے ایک عمر دراز باپ کا کردار نبھایا جس کے بیٹے کی بے وقت موت کو جاتی ہے ۔ اپنے اس کردار کو انوپم کھیر نے اتنی سنجیدگی کے ساتھ نبھا کر ناظرین کا دل جیت لیا۔ ساتھ ہی ساتھ انہیں بہترین اداکار کے فلم فیئر ایوارڈ سے بھی نوازا گیا۔
سال 1986 میں انوپم کھیر کو سبھاش گھئی کی فلم کرما میں بطور ویلن کام کرنے کا موقع ملا۔ اس فلم میں ان کے سامنے اداکاری کے شہنشاہ دلیپ کمار تھے لیکن انوپم کھیر اپنی بااثر اداکاری سے ناظرین کا دل جیتنے میں کامیاب رہے ۔ فلم کی کامیابی کے بعدبطور کھلنائک وہ اپنی شناخت بنانے میں کامیاب رہے ۔
اپنی اداکاری میں آئی یکسانیت کو تبدیل کرنے اور خود کو کریکٹر اداکار کے طور پر بھی قائم کرنے کے لئے انوپم کھیر نے اپنے کردار میں تبدیلی کی۔ اس ترتیب میں سال 1989 میں سبھاش گھئی کی سپر ہٹ فلم رام لکھن میں انہوں نے فلم اداکارہ مادھوری دکشت کے باپ کا کردار نبھایا۔ فلم میں ان کی بااثر اداکاری کے لیے انہیں بہترین مزاحیہ اداکار کے فلم فیئر ایوارڈ سے بھی نوازا گیا۔
سال 1989 میں انوپم کھیر کے فلمی کیریئر کی ایک اور اہم فلم ڈیٹ ریلیز ہوئی۔ فلم میں اپنے پرجوش کردار کو انوپم کھیر نے سدھے ہوئے انداز میں نبھاکر ناظرین کو محظوظ کر دیا۔ اپنی بااثر اداکاری کے لیے وہ فلم فیئر مبصرین ایوارڈ اور قومی ایوارڈ کا خصوصی جیوری ایوارڈ سے نوازے گئے ۔
سال 2003 میں آئی فلم ا وم جے جگدیش کے ذریعے انوپم کھیر نے فلم ہدایت کے میدان میں بھی قدم رکھ دیا اگرچہ فلم باکس آف پر بری طرح ناکام ثابت ہوئی۔ 2005 میں انوپم کھیر نے فلم ۔مینے گاندھی کو نہیں مارا کی تعمیر کی۔ اس فلم میں ان کی بااثر اداکاری کے لیے انہیں کراچی انٹرنیشنل فلم فیسٹیول میں ایوارڈ سے نوازا گیا۔ انوپم کھیر نے کئی ہالی وڈ فلموں میں بھی اپنی اداکاری کے جوہر دکھائے ہیں۔
سال 2000 کی دہائی میں انوپم کھیر نے ناظرین کی پسند کو دیکھتے ہوئے چھوٹے پردے کا بھی رخ کیا۔ سال 2007 میں اپنے دوست ستیش کوشک کے ساتھ مل کر انوپم کھیر نے کروگ باغ پروڈکشن کمپنی قائم کی۔ انوپم کھیر اپنے فلمی کیریئر میں 8 مرتبہ فلم فیئر ایوارڈ سے نوازے جا چکے ہے ۔ فلموں میں متعدد کردار ادا کرنے کے بعد انوپم کھیر نیشنل سینسر بورڈ کے صدر بھی بنے ۔ اس کے علاوہ انہوں نے نیشنل اسکول آف ڈرامہ میں بطور ڈائریکٹر 2001 سے 2004 تک کام کیا۔ فلم کے شعبے میں ان کی قابل ذکر شراکت کو دیکھتے ہوئے پدمشری اور پدم بھوشن اعزاز سے بھی نوازا گیا ہے ۔ انوپم کھیر نے اپنے چار دہائی طویل فلمی کیریئر میں تقریبا 500 فلموں میں کام کیا۔ انوپم کھیر آج بھی جوش و خروش کے ساتھ فلم انڈسٹری میں فعال ہیں۔
