ڈبلیو ایچ اوکی کووڈ 19 ویکسین کے بارے میں شعور اجاگر کرنے کی اپیل

ماسکو ، 12 دسمبر(اسپوتنک) ورلڈ ہیلتھ آرگنائزیشن (ڈبلیو ایچ او) کی چیف سائنسدان سومیا سوامی ناتھن نے دنیا بھر کی حکومتوں اور صحت سے متعلق حکام سے درخواست کی ہے کہ وہ شہریوں کو کوڈ 19 ویکسین کے بارے میں زیادہ سے زیادہ آگاہ کریں۔

محترمہ سوامی ناتھن نے کہا ’’دنیا بھر کی حکومتیں اور صحت عامہ کے عہدیداروں کو اپنے ملکوں کے شہریوں پر ویکسین لگانے کے عمل کی وضاحت کے لئے اقدامات کرنا شروع کردیں کیونکہ معاملات تیزی سے چل رہے ہیں اور لوگوں کے دلوں میں خدشات بڑھتے جارہے ہیں ۔ کووڈ-19 کے حوالہ سے بہت سارے حقیقی سوالات ہیں جن کے جوابات لوگوں کو دینے کی ضرورت ہے‘‘۔
انہوں نے کہا کہ بہت ہی کم لوگ قطرے پلانے کے لئے تیار ہیں۔

موجودہ ڈبلیو ایچ او کی فہرست میں کووڈ 19 سے متعلق 48 ویکسین ہیں۔ کچھ ویکسین تیار کرنے والوں نے ویکسین کے فیز III ٹرائلز کے عبوری نتائج جاری کرنا شروع کردیئے ہیں۔ روس کے اسپوتنک وی ، امریکہ کے فائزر / بائیوٹیک اور موڈیرنا نے ابتدائی اعداد و شمار جاری کیے ہیں جس کے مطابق یہ ویکسین کورونا سے 90 فیصد بچاؤ کرتی ہے۔

ڈبلیو ایچ او کے مطابق کورونا وائرس سے اب تک دنیا بھر میں مجموعی طور پر 69،143،017 کیسز رپورٹ ہوئے ہیں جبکہ 1،576،516 افراد ہلاک ہوچکے ہیں۔