اقراء عزیز اور شہزاد شیخ کا نیا ڈرامہ ’تعبیر‘

اگر آپ کو ہم ٹی وی پر نشر ہونے والا ڈرامہ ’چھوٹی سی زندگی‘ پسند تھا تو یقیناً آپ اس کی کاسٹ کو دوبارہ بھی کسی ڈرامے میں دیکھنا چاہیں گے اور ایسا بہت جلد ہونے والا ہے۔

اداکارہ اقراء عزیز اور شہزاد شیخ بہت جلد ایک ساتھ دوبارہ نئے ڈرامے میں کام کرتے نظر آئیں گے۔

ہم ٹی وی کے نئے ڈرامے ’تعبیر‘ میں یہ دونوں ایک ساتھ نظر آئیں گے، اس کی ہدایات احسن تالش کررہے ہیں۔

ڈان سے بات کرتے ہوئے اس ڈرامے کہ حوالے سے اقراء کا کہنا تھا کہ ’میں کافی پرجوش ہوں، کیوں کہ جب احسن بھائی نے مجھے اسکرپٹ کے بارے میں بتایا تو میں نے اس ہی وقت ان سے کہا کہ آپ کہیں نہیں جارہے، چاہے جو بھی ہو اس ڈرامے میں میں ہی کام کروں گی‘۔

ڈرامے کے ہدایت کار احسن تالش نے اس حوالے سے بتایا کہ ’کچھ عرصہ قبل میں نے اس اسکرپٹ کی دو اقساط پڑھیں، تب میں نے پوچھا یہ کس نے لکھا ہے، مجے بہت حیرانی ہوئی جب پتا چلا کے یہ عمران اشرف کی تحریر ہے، کچھ مسائل کے باعث ہم اس ڈرامے پر کام نہیں کرپائے لیکن اب اس پر کام جاری ہے‘۔

شہزاد شیخ نے ڈرامے کی کہانی بتانے سے انکار کرتے ہوئے کہا کہ ’میں کہانی تو نہیں بتاسکتا کیوں کہ مجھے اجازت نہیں البتہ یہ ضرور بتاسکتا ہوں کہ جو کردار میں اس ڈرامے میں ادا کررہا ہوں ویسا میں نے اب تک نہیں نبھایا، اس ڈرامے کی کہانی اقراء اور میرے کردار پر مبنی ہے‘۔