بہار اسمبلی انتخابات ٢٠٢٥: دوسرے اور آخری مرحلہ میں صبح 9 بجے تک 14.55 فیصد ووٹنگ ریکارڈ

بہار میں دوسرے مرحلہ میں صبح 9 بجے تک 14.55 فیصد ووٹنگ ریکارڈ
ریاستی چیف الیکشن آفیسر کے دفتر کی جانب سے صبح 9 بجے تک ووٹنگ کے اعداد و شمار جاری کیے گئے، جن کے مطابق مجموعی طور پر 14.55 فیصد ووٹ ڈالے گئے۔

الیکشن کمیشن سے موصول معلومات کے مطابق مغربی چمپارن میں 15.04 فیصد، مشرقی چمپارن میں 14.11 فیصد، شیوہر میں 13.94 فیصد، سیتامڑھی میں 13.49 فیصد، مدھوبنی میں 13.25 فیصد، سپول میں 14.85 فیصد، ارریہ میں 15.34 فیصد، کشن گنج میں 15.81 فیصد، پورنیہ میں 15.54 فیصد، کٹیہار میں 13.77 فیصد، بھاگلپور میں 13.43 فیصد، بانکا میں 15.14 فیصد، کیمور (بھوبھوا) میں 15.08 فیصد، روہتاس میں 14.16 فیصد، اراول میں 14.95 فیصد، جہان آباد میں 13.81 فیصد، اورنگ آباد میں 15.43 فیصد، گیا میں 15.97 فیصد، نوادہ میں 13.46 فیصد اور جموئی میں 15.77 فیصد ووٹنگ درج کی گئی ہے۔

ای وی ایم میں خرابی کے سبب کئی مقامات پر ووٹنگ میں تاخیر
ارریہ ضلع کے جوگ بنی مڈل اسکول کے بوتھ نمبر 15، کوچ گاما اسکول کے بوتھ نمبر 34 اور بگوا کے بوتھ نمبر 37 پر ایک گھنٹے تک ای وی ایم خراب ہونے کی وجہ سے ووٹنگ کے عمل میں تاخیر ہوئی۔ اس کے علاوہ سیتامڑھی کے بوتھ نمبر 293 پر بھی ای وی ایم کی خرابی کے باعث ووٹنگ میں رکاوٹ پیش آئی۔

’69 لاکھ ووٹروں کے نام حذف ہونے کے بعد بھی ووٹنگ شرح کیسے بڑھی؟‘- پپو یادو کا سوال
پورنیہ سے آزاد رکن پارلیمنٹ پپو یادو نے کہا، ’’بہار ایس آئی آر عمل کے بعد 69 لاکھ ووٹروں کے نام حذف کر دیے گئے، تو پھر پہلے مرحلے میں ووٹنگ کی شرح کیسے بڑھ گئی؟ بہار ایک بڑے تبدیلی کے دوراہے پر ہے۔

نئی نسل (جنریشن زیڈ) تبدیلی چاہتی ہے۔ وزیر اعظم کٹّا، بم، ڈکیتی جیسی زبان کیوں استعمال کر رہے ہیں؟ کیا اس طرح کی زبان وزیر اعظم کو زیب دیتی ہے؟ وزیر اعظم کبھی بھی بہار کے مسائل پر ووٹ کی اپیل نہیں کرتے۔ بہار کے عوام تبدیلی چاہتے ہیں۔‘‘

بہار اسمبلی انتخابات کا دوسرا اور آخری مرحلہ: 122 نشستوں پر ووٹنگ جاری
بہار اسمبلی انتخابات کے دوسرے اور آخری مرحلے کی ووٹنگ جاری ہے۔ صبح 7 بجے شروع ہونے والا عمل شام 5 بجے تک جاری رہے گا۔ اس مرحلے میں 122 اسمبلی نشستوں پر ووٹ ڈالے جا رہے ہیں،

جہاں 3 کروڑ 70 لاکھ سے زائد ووٹر کل 1302 امیدواروں کی قسمت کا فیصلہ کریں گے۔ ان امیدواروں میں وزیراعلیٰ نتیش کمار کی حکومت کے چھ سے زیادہ وزراء بھی شامل ہیں جن کی ساکھ داؤ پر لگی ہے۔

الیکشن کمیشن کے مطابق، اس مرحلے میں 45 ہزار 399 پولنگ مراکز قائم کیے گئے ہیں جن میں سے 40 ہزار 73 دیہی علاقوں میں واقع ہیں۔ کل ووٹروں میں 1.75 کروڑ خواتین شامل ہیں۔

نوادہ کی ہسوا نشست پر سب سے زیادہ 3.67 لاکھ ووٹر ہیں، جبکہ لوریہ، چنپٹیا، رکسول، تریونی گنج، سُگولی اور بنمکی میں امیدواروں کی تعداد سب سے زیادہ 22-22 ہے۔

پہلے مرحلے میں 121 نشستوں پر پولنگ ہوئی تھی، جس میں 65 فیصد سے زیادہ ووٹ ڈالے گئے تھے۔ دوسرے مرحلے کی ووٹنگ بنیادی طور پر سیمانچل اور ترائی کے علاقوں میں ہو رہی ہے،

جن میں مغربی چمپارن، مشرقی چمپارن، سیتامڑھی، مدھوبنی، سپول، ارریہ اور کشن گنج جیسے اضلاع شامل ہیں۔ یہ تمام علاقے نیپال کی سرحد سے متصل ہیں، جہاں ووٹروں کی حفاظت کو مدِنظر رکھتے ہوئے چار لاکھ سے زائد سکیورٹی اہلکار تعینات کیے گئے ہیں۔