بریٹ لی فلم’ اَن انڈین‘میں سلمان خان کی نقل کرینگے

بالی ووڈ کے دبنگ اداکار سلمان خان کے مداح اپنے پسندیدہ اداکارکے اسٹائل ، ڈائیلاگ اور ڈانس اسٹیپس کی نقل کرتے دکھائی دیتے ہیں ، اب اس صف میں سابق آسٹریلوی فاسٹ بالربریٹ لی بھی شامل ہو گئے ہیں، جو اپنی نئی آنیوالی فلم ’اَن انڈین‘میں سلمان خان کی نقل کرتے دکھائی دینگے۔

آسٹریلین پروڈکشن کے اشتراک سے بننے والی نئی بالی ووڈ فلم سے اداکاری کے میدان میں انٹری دینے کیلئے تیار ہیں جو فلم کے مناظر میں سلمان خان کے ڈانس اسٹیپ کی کاپی کرتے دکھائی دینگے۔

بریٹ لی نے فلم میں سلمان خان کی بلاک بسٹر فلم’کک‘کے گانے ’جمعے کی رات ہے‘ میں ان کے مقبول ڈانس اسٹیپ کی نقل کی ہے، بریٹ لی نے سلمان خان جیسا لباس بھی زیب تن کر رکھا ہے۔

انوپما شرما کی پروڈکشن و ڈائریکشن میں بننے والی اس رومانٹک کامیڈی فلم کی کہانی ایک ایسی بھارتی نژادآسٹریلوی خاتون کے گرد گھومتی ہے جو خاندانی روایا ت سے ہٹ کر ایک غیر ملکی سے شادی کرنے کی خواہشمند ہے تاہم لڑکی کے ماں باپ اپنی بیٹی کے مستقبل کے حوالے سے شدید خدشات کا شکار ہیں۔

دو مختلف تہذیبوں اورثقافتوں کی عکاسی کرتی اس فلم میں بریٹ لی کے ساتھ تنیشا چٹر جی مرکزی کردار میں جلوہ گر ہوں گی، فلم کی دیگر کاسٹ میں گلشن گروور، پلوی شردا، سپریا پاٹھک، ڈیوڈ ووڈلی، جان ہاورڈ، اسٹیفن ہنٹر اور ہیتھر ملٹ مین شامل ہیں۔

کامیڈی اورڈرامہ کا مکس تڑکا لئے رومانٹک فلم 7 اکتوبر کو سینما گھروں کی زینت بنائی جائیگی۔