چین :کیمیکل پلانٹ میں دھماکہ، 3 افراد ہلاک ،4 زخمی

بیجنگ ، 20 دسمبر (اسپوتنک) چین کے شمال مشرقی صوبے ہیئلونگ ژیانگ میں ایک کیمیائی پلانٹ میں ہونے والے دھماکے میں کم از کم تین افراد ہلاک اور چار زخمی ہوگئے۔

میڈیا رپورٹس کے مطابق یہ واقعہ ہفتے کے روز مقامی وقت کے مطابق رات 12:46 بجے اینڈا شہر کے ایک کیمیکل پلانٹ میں پیش آیا۔ دھماکے کے بعد پلانٹ میں آگ لگ گئی ، جسے اس دن صبح تک بجھایا نہیں جاسکا۔

ابتدائی اطلاعات میں ایک شخص کی ہلاکت کی تصدیق کی گئی تھی جبکہ دو افراد کے لاپتہ ہونے کی اطلاع ہے۔ آج صبح لاپتہ افراد کی لاشوں کی تلاش کے بعد ہلاک ہونے والوں کی تعداد تین ہوگئی۔ اس واقعے میں چار افراد زخمی ہوئے ہیں ، جن میں دو کی حالت تشویشناک بتائی جارہی ہے۔

دھماکے کی وجوہات کے بارے میں معلوم کیا جارہا ہے۔ وزارت ماحولیات کی ایک ٹاسک فورس نے ماحول میں کسی بھی مضر کیمیائی مادے کی موجودگی کا پتہ لگانے کے لئے دھماکے کی جگہ کی تحقیقات شروع کردی ہے۔