راہول گاندھی کی مشکلات میں اضافہ، لکھنؤ کی عدالت نے انہیں 24 مارچ کو عدالت میں پیش ہونے کا حکم دیا

 لکھنؤ: اتر پردیش کی رائے بریلی لوک سبھا سیٹ سے کانگریس کے رکن پارلیمنٹ راہول گاندھی کی مشکلات ایک بار پھر بڑھ گئی ہیں۔ لکھنؤ کی ایک عدالت نے ایک معاملے میں لوک سبھا میں اپوزیشن لیڈر راہل گاندھی کے خلاف سمن جاری کیا ہے۔ یہ معاملہ بھارتی فوج کے حوالے سے دیے گئے بیان سے متعلق ہے۔ عدالت نے کانگریس رکن پارلیمنٹ راہول گاندھی کو 24 مارچ کو پیش ہونے کو کہا ہے۔ اس معاملے میں راہل گاندھی پر تعزیرات ہند کی دفعہ 500 کے تحت ہتک عزت کا الزام لگایا گیا ہے۔

دراصل بارڈر روڈز آرگنائزیشن (بی آر او) کے سابق ڈائریکٹر ادے شنکر سریواستو نے کانگریس رکن پارلیمنٹ راہول گاندھی کے خلاف ہتک عزت کا مقدمہ دائر کیا تھا۔ سابق فوجی افسر نے الزام لگایا کہ راہل گاندھی نے 16 دسمبر 2022 کو بھارت جوڑو یاترا کے دوران فوج کے بارے میں بیان دیا تھا۔ جس میں کہا گیا تھا کہ چینی فوجی ہندوستانی فوجیوں کو مار رہے ہیں۔