راجدھانی دہلی میں فضائی آلودگی کی سنگین صورتحال

نئی دہلی : دہلی کے لوگوں کو سنیچر کو بھی آلودگی سے کوئی راحت ملتی نظر نہیں آئی اور آج صبح ایئرکوالٹی انڈیکس (ایک کیو آئی) 405درج کیا گیا جو ’سنگین‘ زمرہ میں آتا ہے۔

سنٹرل پولیوشن کنٹرول بورڈ (سی پی سی بی) کے مطابق دہل کے کئی حصہ صبح کہرے کی چادرسے ڈھکے ہوئے تھے جبکہ کم از کم درجہ حرارت 10.8ڈگری سیلسیس درج کیا گیا اور ہوا کی نسبت نمی 85فیصد درج کی گئی۔

راجدھانی میں ہوا کی رفتار کم ہونے سے آلودگی میں کوئی فرق نہیں پڑا اور نہ ہی ایئرکوالٹی کی بہتری میں کوئی مدد ملی۔ ا سکے علاوہ این سی آر کے کچھ حصوں اور شمالی علاقہ کے دیگر شہروں اور گاووں میں بھی ایئر کوالٹی کی صورتحال ایسی ہی رہی۔ ملک کی بیشتر شمالی ریاستوں کے کچھ مقامات پر فضائی آلودگی کی صورتحال ’بہت خراب‘ سے لرکر ’سنگین‘ تک بنی ہوئی ہے۔

دہلی میں ایئر کوالٹی میں بہتر بنانے کیلئے کچھ مقامات پر انسداد آلودگی گنیں نظر آئیں۔حکومت نے سردیوں کے دوران فضائی آلودگی پر کنٹرول پانے کیلئے کئی احتیاطی اقدامات کئے ہیں جن میں پٹاخے جلانے پر پابندی، جنریٹر پر پابندی، تعمیراتی سرگرمیوں پر روک لگائی گئی ہے۔

سی پی سی بی کے مطابق دہلی کے علاوہ قومی دارالحکومت خطہ کے نوئیڈا، غازی آباد، گروگرام اور فرید آباد کا بھی حال برا ہے اور اے کیو آئی 400سے زیادہ ہے۔ ایئر کوالٹی کے مطابق اے کیو آئی کو صفر سے پچاس کے درمیان’اچھا‘ 51سے 100کے درمیان’اطمینان بخش‘، 101اور 200کے درمیان ’درمیانہ‘،201اور 300کے درمیان ’خراب‘، 301اور 400کے درمیان ’نہایت خراب‘ اور 401سے 500کے درمیان ’سنگین‘ سمجھا جاتا ہے۔