دہلی : خواتین کو 2500 روپے کب ملیں گے؟ عام آدمی پارٹی نے بی جے پی سے کیا جواب طلب

نئی دہلی: عام آدمی پارٹی (عآپ) نے دہلی میں خواتین کو 2500 روپے دینے کے بی جے پی کے وعدے پر سوال اٹھاتے ہوئے راجدھانی کے مختلف مقامات پر مظاہرے کیے۔ پارٹی نے مطالبہ کیا کہ وزیر اعظم نریندر مودی کی ’گارنٹی‘ کے مطابق خواتین کے بینک کھاتوں میں رقم کب آئے گی۔

مظاہروں کے دوران عام آدمی پارٹی کے کارکنان نے ’بس دو دن اور‘ لکھے ہوئے پلے کارڈ اٹھا رکھے تھے اور نعرے بازی کی۔ سابق ایم ایل اے ریتوراج جھا کی قیادت میں کارکنان نے سڑکوں پر عوام کو بی جے پی کے انتخابی وعدے کی یاد دہانی کرائی۔ انہوں نے سوال کیا کہ جب 8 مارچ آنے میں صرف دو دن باقی ہیں تو خواتین کے اکاؤنٹس میں 2500 روپے کب منتقل کیے جائیں گے؟

عام آدمی پارٹی کا کہنا ہے کہ دہلی اسمبلی انتخابات کے دوران بی جے پی اور وزیر اعظم نریندر مودی نے اعلان کیا تھا کہ اگر دہلی میں ان کی حکومت بنتی ہے تو پہلی کابینہ میٹنگ میں خواتین کے لیے 2500 روپے ماہانہ دینے کی اسکیم منظور کی جائے گی اور 8 مارچ تک پہلی قسط ان کے بینک کھاتوں میں پہنچ جائے گی۔

عام آدمی پارٹی کے مطابق، وزیر اعظم نے انتخابی مہم کے دوران کہا تھا کہ خواتین اپنے آدھار کارڈز کو بینک کھاتوں سے لنک کر لیں تاکہ انہیں رقم کی آمد کی اطلاع بروقت مل سکے۔ لیکن بی جے پی کی حکومت بننے کے باوجود، اب تک اس اسکیم پر کوئی عمل درآمد نہیں ہوا۔

گزشتہ تین دنوں سے عام آدمی پارٹی مسلسل سڑکوں پر مظاہرے کر رہی ہے۔ منگل کو سابق وزیر اعلیٰ آتشی کی قیادت میں کارکنان نے منڈی ہاؤس میں احتجاج کیا، جب کہ بدھ کو آئی ٹی او اور دہلی کے کئی دیگر علاقوں میں بی جے پی سے سوال کیا گیا کہ 2500 روپے کب دیے جائیں گے۔

ریتوراج جھا نے کہا کہ خواتین اپنے بینک کھاتوں سے آدھار کارڈز لنک کرا چکی ہیں اور بے چینی سے منتظر ہیں کہ کب رقم آئے گی۔ انہوں نے کہا کہ عام آدمی پارٹی اس وعدے کو “انتخابی جملہ” نہیں بننے دے گی اور سڑکوں سے لے کر اسمبلی تک احتجاج جاری رکھے گی۔

پارٹی کے مطابق، 8 مارچ قریب ہے، لیکن حکومت کی جانب سے کوئی بیان یا وضاحت نہیں دی گئی کہ یہ رقم کب منتقل کی جائے گی۔ اس معاملے پر بی جے پی کی خاموشی پر عام آدمی پارٹی نے سخت اعتراض ظاہر کیا اور وعدے پر فوری عمل درآمد کا مطالبہ کیا۔