کالج میں جئے شری رام کا نعرہ لگانے والے گورنر کو ہٹانے کا مطالبہ، تعلیمی اداروں کو بھگوا رنگ میں بدلنے کی سازش کا الزام

چنئی: تمل ناڈو کے گورنر آر این روی کو لے کر آئے روز نئے تنازعات سامنے آرہے ہیں۔ حال ہی میں، مدورائی تھاگراجا انجینئرنگ کالج میں ایک تقریب سے خطاب کرتے ہوئے، انہوں نے اپنی تقریر کے آخر میں تین بار جے شری رام کا نعرہ لگایا۔

انہوں نے طلباء سے بھی جئے شری رام کا نعرہ لگانے کو کہا۔ اس کے لیے گورنر روی پر ہر جانب سے تنقید کی جا رہی ہے۔۔

سی پی آئی ایم کی ریاستی انتظامی کمیٹی نے آر این روی کے رویہ کی سخت مذمت کی ہے اور ان پر الزام لگایا ہے کہ وہ اعلیٰ تعلیمی اداروں کو ہندوتوا مراکز میں تبدیل کرنے کی کوشش کر رہے ہیں۔

سی پی آئی ایم کے ریاستی سکریٹری پی شانموگم نے ایک بیان جاری کرتے ہوئے کہا کہ سپریم کورٹ کا یہ فیصلہ کہ گورنر آر این روی نے تمل ناڈو اسمبلی میں منظور شدہ 10 بلوں کو منظوری کے لیے روک دیا تھا، غیر قانونی تھا۔ اس کے باوجود وہ اپنے آئینی فرائض کے برعکس آر ایس ایس کے پرچارک کے طور پر کام کر رہے ہیں۔

انہوں نے کہا کہ تعلیمی اداروں کو بھگوا بنانے کی گورنر کی کوششوں کو برداشت نہیں کیا جا سکتا، جو سیکولرازم، سائنس اور عقلیت کے دروازے ہیں۔ یہ مسلسل ثابت ہو رہا ہے کہ ان کے پاس گورنر جیسے سیکولر آئینی اعلیٰ عہدے پر رہنے کی کوئی اہلیت نہیں ہے۔ سی پی آئی ایم لیڈر نے گورنر روی کو عہدے سے ہٹانے کا مطالبہ کیا۔

گزشتہ ہفتہ (12 اپریل) کو مدورائی تھیاگراج انجینئرنگ کالج میں ایک پروگرام منعقد کیا گیا۔ تمل ناڈو کے گورنر آر این روی نے بطور مہمان خصوصی شرکت کی۔ اس وقت انہوں نے طلباء سے ‘جے شری رام’ کا نعرہ لگانے کو کہا تھا جس کی تمل ناڈو کی مختلف سیاسی جماعتوں کے لیڈروں نے سخت مذمت کی ہے۔