بھیک مانگنے میں جدید ٹیکنالوجی کا استعمال، دبئی پولیس نے خبردار کردیا

55دبئی پولیس نے شہریوں کو رمضان المبارک کے دوران آن لائن بھیک مانگنے اور دیگر دھوکہ دہی کی سرگرمیوں سے خبردار کرتے ہوئے کہا ہے کہ نوسرباز اور فراڈی افراد لوگوں کی سخاوت اور عطیات کا ناجائز فائدہ اٹھانے کی کوشش کرتے ہیں۔

پولیس کا کہنا ہے کہ شہری صرف سرکاری طور پر مجاز فلاحی اداروں کے ذریعے ہی زکوٰۃ اور خیرات دیں اور کسی بھی مشتبہ اپیل یا عطیات کی درخواست پر توجہ نہ دیں، آن لائن بھیک مانگنے والے افراد کے خلاف سخت کارروائی کی جائے گی، جس کے تحت مجرم کو تین ماہ قید کی سزا اور 10 ہزار درہم جرمانہ بھی ہوسکتا ہے۔

حکام نے عوام کو ہدایت دی کہ اگر کسی مشتبہ آن لائن اپیل یا فراڈ کی اطلاع ملے تو فوراً متعلقہ حکام کو آگاہ کریں تاکہ کارروائی ممکن ہو سکے، رمضان کے مقدس مہینے میں پیشہ وار گداگر اور دھوکہ باز افراد زیادہ سرگرم ہو جاتے ہیں، کیونکہ شہری اس دوران زیادہ عطیات اور خیرات دینے کے جذبے میں ہوتے ہیں۔ اس کے نتیجے میں آن لائن اور سوشل میڈیا پلیٹ فارمز پر جعلی عطیات کی درخواستیں عام ہو جاتی ہیں، جس سے نہ صرف شہری متاثر ہوتے ہیں بلکہ فراڈی عناصر کو غیر قانونی فائدہ بھی پہنچتا ہے۔

حکام نے شہریوں سے اپیل کی کہ وہ کسی بھی ویب سائٹ، سوشل میڈیا یا آن لائن پلیٹ فارم پر گردش کرنے والی مشتبہ اپیلوں پر کبھی بھی اعتماد نہ کریں اور اپنی زکوٰۃ اور خیرات ہمیشہ مجاز اداروں کے ذریعے دیں۔ اس کے ساتھ ہی انہوں نے عوام کو ہدایت دی کہ کسی بھی دھوکہ دہی یا آن لائن بھیک مانگنے کی کوشش کے معاملے میں فوراً پولیس یا متعلقہ حکام کو رپورٹ کریں تاکہ قانون کے مطابق کارروائی کی جا سکے۔