کورونا وائرس | اماراتی اداکار ابراہم المریسی بھی کورونا کا شکار

متحدہ عرب امارات (یو اے ای) کے اداکار ابراہیم المریسی بھی کورونا وائرس کا شکار ہوگئے اور انہوں نے اس مرض میں مبتلا ہونے اور اپنی علامات سے متعلق ایک ویڈیو کے ذریعے مداحوں کو آگاہ کیا۔

گلف نیوز کی رپورٹ کے مطابق ابراہم المریسی نے سوشل میڈیا پر شیئر کی گئی ویڈیو میں بتایا کہ ابتدائی طور پر ان میں کورونا وائرس کی کوئی علامات نہیں تھیں جس کے باعث انہیں وائرس کا شکار ہونے کا علم نہیں ہوا۔

اداکار کا کہنا تھا کہ وہ اس وقت بھی کورونا کا شکار ہیں اور ایک ہفتے سے ہسپتال میں زیر علاج ہیں جب کہ ہسپتال سے قبل بھی وہ ایک ہفتے تک گھر میں قرنطینہ ہوگئے تھے اور اس وقت بھی وہ وبا کا شکار تھے۔

اداکار نے بتایا کہ جب وہ گھر میں قرنطینہ ہوگئے تھے تو ابتدائی طور پر ان میں کوئی علامات ظاہر نہیں ہوئی تھیں، تاہم بعد ازاں ان کی ناک بہنے لگی اور انہیں خشک کھانسی بھی شروع ہوگئی۔

اداکار کے مطابق ابتدائی طور پر انہوں نے سمجھا کہ انہیں موسمی سردی کا اثر ہے، تاہم بعد ازاں ان کی سونگھنے اور ذائقے کو محسوس کرنے کی صلاحیت بھی متاثر ہوگئی جس کے بعد انہوں نے ٹیسٹ کروایا جو کہ مثبت آیا۔