سونے اور چاندی کی قیمتوں میں کمی، بڑھتی سیاسی کشیدگی اور عالمی معاشی حالات ذمہ دار

سونے اور چاندی کی قیمتوں میں مسلسل کمی کا سلسلہ جاری ہے۔ قیمتوں میں کمی کی وجہ سے اسے خریدنے کا سنہری موقع بن گیا ہے۔ ملک کی راجدھانی دہلی میں پیر کو 24 کیرٹ سونے کی قیمت 1,150 روپے گر کر 78,350 روپے فی 10 گرام رہ گئی۔

یہ کمی 99.9 فیصد خالص سونے کی قیمت میں ریکارڈ کی گئی۔ جبکہ اس سے قبل جمعہ کو سونے کی قیمت 79,500 روپے فی 10 گرام تھی۔ اس کے ساتھ ہی چاندی کی قیمت میں بھی 300 روپے کی کمی ہوئی اور یہ اب 92,500 روپے فی کلو ہو گئی ہے۔

رپورٹ کے مطابق ماہرین کا خیال ہے کہ سونے کی قیمتوں میں اتار چڑھاؤ کی بڑی وجہ مشرق وسطیٰ میں بڑھتی ہوئی سیاسی کشیدگی اور عالمی معاشی حالات ہیں۔ اسرائیل اور خلیجی ممالک کے درمیان تنازعات اور امریکی معیشت میں غیر یقینی صورتحال کی وجہ سے بین الاقوامی سطح پر بھی سونے کی مانگ متاثر ہو رہی ہے۔

سونے کی قیمتوں میں کمی کی ایک اور وجہ عالمی منڈیوں میں ڈالر کی مضبوطی اور شرح سود میں ممکنہ تبدیلیاں ہیں۔ ورلڈ گولڈ کونسل (ڈبلو جی سی) کی رپورٹ کے مطابق 2025 تک سونے کی قیمتوں میں کمی دیکھی جا سکتی ہے۔

بین الاقوامی مارکیٹ میں بھی سونے اور چاندی کی قیمتوں میں اتار چڑھاؤ دیکھا گیا۔ کامیکس گولڈ فیوچر $2.70، یا 0.10 فیصد بڑھ کر $2,678.50 فی اونس ہوگیا۔ اسی دوران ایشیائی تجارتی سیشن میں چاندی کی قیمت 31.11 ڈالر فی اونس ریکارڈ کی گئی۔

ورلڈ گولڈ کونسل کا خیال ہے کہ 2025 میں سونے اور چاندی کی قیمتیں مستحکم ہو سکتی ہیں۔ تاہم امریکی صدر ڈونلڈ ٹرمپ کے دوسرے دور حکومت میں تجارتی جنگ اور اقتصادی ترقی پر غیر یقینی صورتحال کے باعث سونے کی مانگ میں اضافے کا امکان ہے۔