کورونا سے متاثر منگلیش ڈبرال کے لئے فنڈ کی اپیل

نئی دہلی، یکم دسمبر (یو این آئی) ساہتیہ اکیڈمی انعام یافتہ ہندی کے معروف شاعر اور سینئر صحافی منگلیش ڈبرال کورونا سے متاثر ہونے کے سبب اسپتال میں داخل ہیں اور ان کی حالت کافی نازک ہے۔

بہتر (72 سالہ) مسٹر ڈبرال کو تین دن قبل نصف شب کے بعد اچانک سانس لینے میں تکلیف کے سبب غازی آباد کے وسندھرا کے ایک اسپتال میں داخل کرایا گیا تھا۔وہ اسپتال کے آئی سی یو میں ہیں اور انہیں آکسیجن سپورٹ پر رکھا گیا ہے۔ان کے پھیپھڑے میں نمونیا ہوگیا ہے جس کے سبب انکی حالت سنگین ہے۔

پرتی پکش، جن ستا، سہارا، شکروار جیسے اخبارات اور رسالوں کی ایڈیٹنگ سے وابستہ مسٹر ڈبرال کے علاج کے لئے ادیبوں نے لوگوں سے مالی مدد کی اپیل کی ہے۔
سوشل میڈیا پر ان ادیبوں اور صحافیوں نے کراؤڈ فنڈنگ کی اپیل کی ہے تاکہ مسٹر ڈبرال کا علاج کیا جاسکے۔ مسٹر ڈبرال سبکدوش ہونے کے بعد فری لانس ایڈیٹر کے طور پر صحافت کررہے ہیں۔