ایک کروڑ روپے مالیت کا سونے اورجواہرات کا کلش چوری، پولیس نے ملزم کی شناخت کی

 نئی دہلی : قومی راجدھانی میں تاریخی لال قلعہ کے پیچھے ایک تقریب میں رکھا گیا تقریباً ایک کروڑ روپے مالیت کا سونے اور جواہرات کا کلش چوری ہو گیا۔

یہ کلش ایک جین مذہبی رسم کے دوران غائب ہوا جس سے پروگرام کے مقام پر افرا تفری مچ گئی اور سکیورٹی انتظامات پر سوالات  اٹھنے لگے۔
اطلاعات کے مطابق  کلش تقریباً 760 گرام خالص سونے سے بنا ہوا تھا اور اس پر تقریباً 150 گرام ہیرے، یاقوت اور زمرد جڑے ہوئے تھے۔

یہ مذہبی پروگرام 28 اگست سے 9 ستمبر تک جاری رہے گا، جہاں صرف دھوتی کرتا پہنے اور اجازت یافتہ عقیدت مندوں کو ہی داخلے کی اجازت ہے۔
یہ واقعہ 2 ستمبر کو اس وقت پیش آیا جب لوک سبھا کے اسپیکر اوم برلا تقریب میں شرکت کے لیے وہاں پہنچے۔

اچانک، ہجوم اور ہنگامے  کے درمیان، کلش اسٹیج سے غائب ہو گیا۔ شروع میں ایسا لگا  کہ کلش وہیں کہیں رکھا رہ گیا ہے لیکن بعد میں معلوم ہوا کہ وہ چوری ہو گیا ہے۔

اس کے بعد متاثرہ سدھیر جین نے کوتوالی تھانے میں واقعہ کی شکایت درج کرائی۔ پولیس افسر نے بتایا کہ شکایت پر ایف آئی آر درج کر لی گئی ہے اور فوری طور پر تحقیقات شروع کر دی گئی ہے۔ تحقیقات میں جائے وقوعہ کے سی سی ٹی وی فوٹیج کی جانچ کی گئی ہے۔

ایک فوٹیج میں ایک مشتبہ شخص کو دیکھا گیا جو کئی دنوں سے دھوتی کُرتا پہنے عقیدت مندوں کے درمیان گھوم رہا تھا اور موقع پا کر اسٹیج پر پہنچا تھا۔

فوٹیج میں ملزم واضح طور پر ایک بیگ میں کلش لے کر باہر جاتا ہوا نظر آرہا ہے۔ افسر نے دعویٰ کیا ہے کہ اس کی شناخت کر لی گئی ہے اور تلاش جاری ہے۔

اس کے لیے ایڈیشنل ڈپٹی کمشنر آف پولیس افسر کی نگرانی میں کئی ٹیمیں تشکیل دی گئی ہیں جو تکنیکی اور انسانی ذرائع سے تلاش کر رہی ہیں۔