ہاکی کوچ پرتیما بروا کا انتقال، کھیل کی دنیا میں سوگ کی لہر

رانچی: جھارکھنڈ کی معروف ہاکی کوچ پرتیما بروا کا آج انتقال ہوگیا۔ انہیں کل فالج کا دورہ پڑا تھا، جس کے بعد انہیں رانچی کے پارس اسپتال کے آئی سی یو میں داخل کرایا گیا تھا۔ ڈاکٹروں کی تمام تر کوششوں کے باوجود وہ زندگی کی جنگ ہار گئیں۔ ان کی موت سے کھیل کود کی دنیا میں سوگ کی لہر دوڑ گئی ہے۔

پرتیما بروا کھونٹی میں رہائشی ہاکی ٹریننگ سینٹر کی ہیڈ کوچ تھیں اور انہوں نے جھارکھنڈ کی خواتین کی ہاکی کو قومی شناخت دلانے میں اہم کردار ادا کیا ہے۔ وہ سمڈیگا میں بھی کوچ رہ چکی ہیں اور ان کی تربیت کے نتیجے میں کئی باصلاحیت کھلاڑی بین الاقوامی سطح تک پہنچ چکے ہیں۔

شاگردوں میں کئی بڑے نام شامل

ارجن ایوارڈ یافتہ سلیمہ ٹیٹے، سنگیتا کماری، بیوٹی ڈنگ ڈنگ، دیپیکا سورینگ، رجنی کیرکیٹا، اور سشما کماری جنہوں نے ہندوستان اور جھارکھنڈ کا نام پوری دنیا میں روشن کیا۔

کوچ بروا کی موت کی خبر ملتے ہی کھیل کی دنیا میں سوگ کی لہر دوڑ گئی۔ ان کو خراج عقیدت پیش کرنے والوں کی ایک طویل فہرست ہے۔ کھلاڑیوں، کوچوں، کھیلوں کے منتظمین اور کھیل سے محبت کرنے والوں نے انہیں جذباتی خراج عقیدت پیش کرتے ہوئے انہیں ‘ماں جیسا رہنما’ قرار دیا۔ محکمہ کھیل اور جھارکھنڈ ہاکی ایسوسی ایشن نے بھی افسوس کا اظہار کیا اور انہیں جھارکھنڈ ہاکی کی بنیاد اور جدوجہد کی مثال قرار دیا۔