لوجہاد قانون سے بے روزگاری اور غریبی ختم ہو تو ہمیں کوئی دقت نہیں:دگوجے

دموہ،یکم دسمبر(یواین آئی) مدھیہ پردیش کے سابق وزیراعلی دگوجے سنگھ نے لو جہاد کے سلسلے میں کہا ہے کہ اگر اس سے بے روزگاری،پسماندگی اور غریبی ختم ہوجائے تو ہمیں کوئی دقت نہیں۔

مسٹر سنگھ نے ایک نجی پروگرام میں بھوپال سے پنا جاتے وقت کل رات دموہ میں بی جےپی حکومت پر اہم مسئلوں سے توجہ بھٹکانے کا الزام لگاتے ہوئے کہا کہ آج جو مسئلے ہیں،حکومت ان پر کیوں توجہ نہیں دے رہی ہے۔

انہوں نے کورونا ویکسن کے مدھیہ پردیش میں لوگوں پر ہونے والے ٹیسٹ پر کہا کہ اس میں پروٹوکول پر عمل ہونا چاہئے۔حکومت کو جلدبازی نہیں کرنی چاہئے۔اگر کوئی برا اثر ہوا تو ذمہ داری کس کی ہوگی۔

کسان تحریک پر انہوں نے کہاکہ کسان اپنی بنیادی سہولیات کا مطالبہ کررہے ہیں۔ بی جےپی کو اس پر بات چیت کرنی تھی۔ اس قانون سے بڑے لوگوں اور ملٹی نیشنل سطح کے لوگوں کو فائدہ پہنچایا جارہا ہے ،اس لئے کسان تحریک کررہے ہیں۔ اگر قانون لانے سے پہلے ہی حکومت کسانوں سے بات کرلیتی،تو یہ نوبت ہی نہیں آتی۔

مسٹر سنگھ نے ضمنی انتخابات کے نتائج کے سلسلے میں کہا کہ الیکشن کے نتائج کانگریس کی امید کے مطابق نہیں رہے۔ اس بات کا بھی جائزہ لیا جارہا ہے۔ مستقبل میں ہونے والے علاقائی بلدیاتی انتخابات میں نوجوانوں کو موقع دیا جائےگا۔