تبدیلی مذہب نہیں ہونے دیں گے ، ایسا سبق دیں گے کہ پورا ملک یاد رکھے گا: شیو راج

بھوپال:مدھیہ پردیش کے وزیر اعلی شیوراج سنگھ چوہان نے آج کہا کہ ریاست میں تبدیلی مذہب کو جاری نہیں رہنے دیا جائے گا اور ایسے سماج دشمن عناصر کو ایسا سبق سکھایا جائے گا کہ پورا ملک یاد رکھے گا۔مسٹر چوہان نے یہاں نامہ صحافیوں سے بات چیت کے دوران کہا کہ اگر کوئی گڑبڑ کرے گا تو وہ ایسا سبق سکھائیں گے کہ پورا ملک یاد رکھے گا۔ ہم ریاست میں مذہب کی تبدیلی کے چکر کو جاری نہیں رہنے دیں گے ۔ غنڈہ گردی اور داداگردی نہیں چلنے دی جائے گی۔ ایسے سماج دشمن عناصر اور غنڈوں کو کسی قیمت پر بخشا نہیں جائے گا۔

ریاست کی راجدھانی بھوپال سے ایک ویڈیو سوشل میڈیا پر وائرل ہوئی تھی، جس میں کچھ نوجوان ایک نوجوان کو اس کے گلے میں پٹا ڈال کر کتے کی طرح بھونکنے پر مجبور کر رہے تھے ۔ ویڈیو کے آخر میں متاثرہ شخص کو یہ کہتے ہوئے سنا ئی دے رہا تھاکہ اسے رہا کر دیا جائے اور وہ ‘میاں بھائی’بننے کے لیے تیار ہے ۔ اس کے بعد اس ویڈیو کے تار بھی مبینہ طور پر تبدیلی مذہب سے بھی جڑ گئے تھے ۔اس ویڈیو کے عوام میں آتے ہی  چوہان نے ناراضگی ظاہر کی اور پولیس کمشنر بھوپال اور کلکٹر بھوپال کو مجرموں کے خلاف سخت کارروائی کرکے مثال قائم کرنے کی سخت ہدایات دیں۔

وزیر اعلیٰ کی ہدایت پر جرائم پیشہ افراد کے خلاف نیشنل سیکیورٹی ایکٹ کے تحت کارروائی کی جا رہی ہے ۔ وہیں تینوں مجرموں کے گھر پربلڈوزر کی کارروائی کرتے ہوئے تجاوزات توڑ دیئے گئے ۔ اس معاملے میں اب تک چار لوگوں کو گرفتار کیا جا چکا ہے ۔