کھڑگے نے ذات پات کی مردم شماری کے تعلق سے  وزیراعظم کولکھا خط

 نئی دہلی : کانگریس صدر ملکارجن کھڑگے نے ذات پات کی مردم شماری کے سلسلے میں وزیر اعظم نریندر مودی کو خط لکھ کر کہا ہے کہ وہ کچھ تجاویز دے رہے ہیں تاکہ ذات  پات پر مبنی مردم شماری جیسے کسی بھی عمل میں  پسماندہ، محروم اور پسماندہ لوگوں کو ان کے حقوق مل سکیں۔

مسٹر کھڑگے نے کہا کہ جب انہوں نے گزشتہ سال مسٹر مودی کو اس مطالبے سے متعلق  خط لکھا تو بی جے پی لیڈروں نے انہیں اور کانگریس کو گھیرنے کی کوشش کی اور ان پر مسلسل تنقید کی، لیکن اب وزیر اعظم خود کانگریس کے اس مطالبے کی گہرائی کو سمجھ چکے ہیں، اس لیے انہوں نے ذات پات کی مردم شماری کرانے کا فیصلہ کیا اور اسے سماجی انصاف اور سماج کو بااختیار بنانے کے لیے ضروری بتایا۔

مسٹر کھڑگے نے وزیر اعظم کو مخاطب کرتے ہوئے اپنے خط میں کہا ’’میں نے آپ کو 16 اپریل 2023 کو ایک خط لکھا تھا اور آپ کے سامنے کانگریس کی طرف سے ذات پات کی مردم شماری کرانے کا مطالبہ رکھا تھا، افسوس کہ مجھے اس خط کا کوئی جواب نہیں ملا، اس کے بعد، آپ کی پارٹی کے لیڈروں نے اور خود آپ نے   کانگریس پارٹی  اور کانگریس  قیادت  پر  اس  جائز مطالبے کو اٹھانے کے لیے  مسلسل حملے کئے۔ آج آپ خود تسلیم کررہے ہیں کہ یہ مانگ   گہرے سماجی انصاف اور سماجی طور پر  بااختیار بنانے کا مفاد میں ہے۔
انہوں نے لکھا ’’آپ نے بغیر کسی واضح وضاحت کے اعلان کیا ہے کہ اگلی مردم شماری، جو دراصل 2021 میں ہونے والی ہے، اس میں ذات کو بھی الگ زمرہ کے طور پر شامل کیا جائے گا۔ اس سلسلے میں میرے پاس تین تجاویز ہیں، جن پر آپ غور کریں۔‘‘

پیر کو مسٹر مودی کو لکھے گئے خط میں کانگریس صدر نے تجویز پیش کی کہ ذات پات کی مردم شماری کے لیے تلنگانہ ماڈل کو اپناتے ہوئے ریزرویشن پر 50 فیصد کی حد کو ختم کیا جانا چاہیے اور اس کے لیے تمل ناڈو کی طرز پر قانون بنے۔ نیز، پرائیویٹ تعلیمی اداروں میں درج فہرست ذات، درج فہرست قبائل اور دیگر پسماندہ طبقے کے طلبہ کو ریزرویشن فراہم کرنے کے لیے آرٹیکل 15(5) کو لاگو کیا جائے۔

انہوں نے مسٹر مودی سے ذات پات کی مردم شماری کے معاملے پر جلد ہی تمام سیاسی جماعتوں سے بات چیت کرنے کی اپیل کی ہے۔