ایران نے سلمان رشدی کے حملہ آور کے ساتھ کسی بھی طرح کے ربط سے صاف صاف انکار کیا

ایران نے سلمان رشدی کے حملہ آور کے ساتھ کسی بھی طرح کے ربط سے صاف صاف انکار کیا ہے۔ نیویارک میں 75 سالہ سلمان رشدی پر ایک تقریب کے دوران چاقو سے حملہ کیا گیا تھا، جس میں وہ شدید طور پر زخمی ہو گئے تھے۔ اب وہ ٹھیک ہو رہے ہیں۔ 1988 میں شائع ہونے والے اپنے ناول

The Satanic Verses

کی وجہ سے اُنہیں سالوں سے موت کی دھمکیوں کا سامنا ہے۔
اس سے پہلے امریکہ کے وزیر خارجہ انٹنی بلنکن نے ایران کی سرکاری میڈیا پر حملے کے بارے میں خوش ہونے کا الزام لگاتے ہوئے اس رویے کو قابل مذمت قرار دیا تھا۔ جمعے کو ہوئے اس حملے کی خبر پھیلنے کے بعد نگاہیں تہران پر ٹکی ہوئی تھیں، جہاں سے تین دہائی سے زیادہ عرصے پہلے، پہلی بار مصنف کو ہلاک کرنے کا فتویٰ جاری ہوا تھا۔
پیر کو ایران کی وزارتِ خارجہ کے ترجمان Nasser Kanaani نے ملک کی طرف سے پہلے سرکاری ردِّ عمل میں کہا کہ تہران کسی طرح کے ربط سے صاف صاف انکار کرتا ہے۔ انہوں نے مزید کہا کہ کسی کو یہ حق حاصل نہیں ہے کہ وہ اسلامی جمہوریہ ایران پر الزام لگائے۔ البتہ انہوں نے کہا کہ بولنے کی آزادی کا مطلب یہ نہیں ہے کہ جناب رشدی اپنی تحریروں میں مذہب کی بے حرمتی کریں۔×