او بی سی ذاتوں کی ایس سی میں شمولیت کا فیصلہ محض دھوکہ: مایاوتی

لکھنؤ: بہوجن سماج پارٹی (بی ایس پی) سپریمو مایاوتی نے یوگی حکومت کی تنقید کرتے ہوئے کہا کہ اترپردیش حکومت ضمنی انتخابات میں فائدہ حاصل کرنے کے لئے ریاست کی 17 او بی سی ذاتوں کو ایس سی میں شامل کرنے کا ناٹک کرر ہی ہے۔

بی ایس پی نے پیر کو یہاں جاری اپنے بیان میں کہا کہ یوگی حکومت کا ریاست کی 17 ذاتوں کو شیڈول کاسٹ میں شامل کرنا پوری طرح سے غیرقانونی اور غیر آئینی ہے۔ جب حکومت جانتی ہے کہ ان 17 ذاتوں کو ایس سی سماج کا فائدہ نہیں مل سکتا تو حکومت نے ایسا فیصلہ کیوں کیا ہے۔ انہوں نے کہا کہ اس سے صاف ہے کہ یوگی حکومت نے ایس پی حکومت کی طرح ان 17 طبقات کو دھوکہ دینے کے لئے ایسا حکم نامہ جاری کیا ہے۔

https://twitter.com/ANINewsUP/status/1145568707252576257

محترمہ مایاوتی نے کہا کہ اگر ایسا کیا جانا ہے تو پہلے ایس سی سماج کا کوٹہ بڑھایا جائے جس سے کہ کوٹے میں شامل ہوئیں 17 نئی او بی سی ذاتوں کو اس کا فائدہ مل سکے۔ انہوں نے کہا کہ یہ فیصلہ 17 پسماندہ طبقات کے افراد کے ساتھ بڑا دھوکہ ہے۔ اس فیصلے سے 17 ذاتوں کو ایس سی سماج کو حاصل مراعات نہیں ملیں گی کیونکہ کوئی بھی ریاستی حکومت انہیں اپنے حکم نامے کی بدولت کسی بھی زمرے میں نہیں ڈال سکتی ہے یا انہیں نہیں ہٹا سکتی ہے۔

بی ایس پی سپریمو مایاوتی نے کہا کہ اگر ایسا کرنا ضروری تھا کہ ان 17 ذاتوں کو ایس سی زمرے میں شامل کیا جائے تو شیڈول کاسٹ زمرے کے ریزرویشن کوٹے کو بڑھایا جانا چاہئے تھا۔ اس سے ایس سی سماج کو ملنے والے فائدے میں کمی نہیں ہوتی اور جن 17 ذاتوں کو ایس سی زمرے میں جوڑا جاتا انہیں بھی اس کا فائدہ ملتا رہتا۔ پہلے بھی اس طرح کا مطالبہ ہوتا رہا ہے لیکن مرکز کی حکومتوں نے اس بارے میں کچھ نہیں کیا۔

محترمہ مایاوتی نے کہا کہ سابق میں جب سماجوادی پارٹی( ایس پی) حکومت کے ذریعہ بھی اسی طرح کی غیر قانونی طریقے سے ان 17 ذاتوں کو دھوکہ دینے کی نیت سے حکم جاری کیا گیاتھا اس وقت بھی بہوجن سماج پارٹی(بی ایس پی) نے اس کی مخالفت کی تھی۔

انہوں نے کہا کہ سال 2007 میں بی ایس پی کی حکومت کے دوران ان 17 ذاتوں کو ایس سی زمرے میں شامل کئے جانے کے لئے اس وقت کی کانگریس کی قیادت والی مرکزی حکومت کو خط لکھا تھا جس میں مطالبہ کیا گیا تھا کہ ان 17 ذاتوں کو ایس سی زمرے میں جوڑنے کے ساتھ ساتھ اس زمرے کا کوٹہ بھی اسی مناسبت سے بڑھایا جائے۔

قابل ذکر ہے کہ ریاست کی یوگی حکومت نے 17 انتہائی پسماندہ ذاتوں کو ایس سی زمرے میں شامل کرنے کا فیصلہ کیا ہے۔ حالانکہ الہ آباد ہائی کورٹ میں دائر ایک عرضی کی وجہ سے ان 17 ذاتوں کو جاری ہونے والے ذات سرٹیفکیٹ عدالت کے آخری فیصلے کے ماتحت ہوں گے۔