جسپریت بمراہ کی چوٹ نے بڑھائی بی سی سی آئی کی تشویش، لندن میں 3 ایکسپرٹ سے مانگی مدد

ٹیم انڈیا کے زخمی تیز گیند باز جسپریت بمراہ کمر کے نچلے حصے میں لگی چوٹ (اسٹریس فریکچر) پر خصوصی رائے لینے کیلئے انگلینڈ جائیں گے۔ اس چوٹ کے سبب بمراہ کم سے کم دو مہینے تک ٹیم انڈیا سے باہر ہو گئے۔

اس دوران وہ جنوبی افریقہ اور بنگلہ دیش کے خلاف ٹیسٹ سیریز میں حصہ نہیں لے پائیں گے۔ ساڑھے تین سال کے کریئر میں یہ پہلی مرتبہ ہوگا جب بمراہ چوٹ کے سبب اتنے طویل وقت تک ٹیم سے دور رہیں گے۔

بی سی سی آئی کے ایک افسر نے رازداری کی شرط پر بتایا کہ بی سی سی آئی اسٹریس فریکچر کے علاج کیلئے بمراہ کو لندن بھیج رہا ہے۔ اس دوران این سی اے کے فیزیو تھیریپسٹ اشیش کوشک ان کے ساتھ رہیں گے۔ بی سی سی آئی نے تین الگ۔الگ ماہرین سے رائے لینے کیلئے وقت لیا ہے۔ ان کا آگے کا منصوبہ تین ڈاکٹروں سے ملی رائے پر منحصر کرے گا۔ ہم نے اس معاملے پر بہترین ڈاکٹروں سے مشورہ کیا ہے۔

ٹیم کو جنوبی افریقہ اور بنگلہ دیش کے خلاف عالمی ٹیسٹ چیمپئن شپ میں بمراہ کی کمی کا احساس ہوگا۔ 25 سال کا یہ گیند باز گزشتہ دو سالوں میں ٹیم کا اہم گیند باز بن کر ابھرا ہے۔انہوں نے 12 ٹیسٹ میں 62 وکٹ جبکہ 58 یک روزہ میں 103 وکٹ لئے ہیں۔ ٹی 20 میں ان کے نام 42 میچ میں 51 وکٹ ہیں۔