سعودی عرب کے ثقافتی فیسٹیول کے دوران فنکاروں پر چاقو سے حملہ

سعودی عرب کے دارالحکومت ریاض میں ہونے والے ثقافتی فیسٹیول میں ایک پرفارمنس کے دوران یمنی شخص نے فنکاروں پر چاقو سے حملہ کردیا۔

سوشل میڈیا پر وائرل ایک ویڈیو میں اسٹیج پر مرد و خواتین فنکار پرفارم کرتے نظر آرہے تھے، جس دوران ایک شخص نے اسٹیج پر آکر ان فنکاروں پر حملہ کیا، جس کے نتیجے میں 2 مرد جبکہ ایک خاتون فنکار زخمی ہوگئے۔

گلف نیوز کی رپورٹ کے مطابق ریاض میں رواں سال اکتوبر کے پہلے ہفتے سے شروع ہونے والے کلچرل فیسٹیول کے دوران فنکاروں پر حملہ کرنے والے شخص کو پولیس نے فوری طور پر گرفتار کرلیا جبکہ جس چاقو سے حملہ کیا گیا وہ بھی پولیس نے اپنی تحویل میں لے لیا۔

یہ تقریب ریاض کے کنگ عبداللہ پارک میں جاری تھی، جہاں غیر ملکی تھیٹر فنکار نیم عریاں ملبوسات میں پرفارم کررہے تھے۔

پولیس کے مطابق حملہ کرنے والے شخص کا تعلق یمن سے ہے جبکہ اس کی عمر 33 سال بتائی جارہی ہے۔

رپورٹ میں مزید بتایا گیا کہ جن فنکاروں پر حملہ کیا گیا انہیں فوری طور پر ہسپتال منتقل کیا گیا، جن کی حالت اب خطرے سے باہر ہے۔

واضح رہے کہ ’ریاض سیزن‘ نامی یہ میلہ رواں برس دسمبر کے وسط تک جاری رہے گا اور اس میں متعدد عرب فنکاروں سمیت مغربی ممالک کے فنکاروں کی جانب سے بھی پرفارمنس کیے جانے کا امکان ہے۔

اس میلے کے پروگرامات دیکھنے کے لیے سعودی عرب کے تمام شہروں سے مرد و خواتین سمیت نوجوانوں کی بڑی تعداد پہنچ رہی ہے اور پہلی بار مرد و خواتین کو ایک ہی جگہ مکمل تفریحی ماحول دیکھنے کو مل رہا ہے اور اس میلے کی تعریفیں پوری دنیا میں ہو رہی ہیں۔

یاد رہے کہ اسی سیزن میں 25 اکتوبر کو پاکستانی گلوکاروں راحت فتح علی خان اور عاطف اسلم نے پرفارمنس کرکے مداحوں کے دل جیتے تھے۔