کم آمدنی والے دولت مند لوگوں سے زیادہ خوش رہتے ہیں، سروے

یہ اکثر کہا جاتا ہے کہ پیسہ خوشی نہیں خرید سکتا یہ بات اب ایک سروے میں سچ ثابت ہوتی دکھائی دے رہی ہے۔

اگرچہ عام طور پر یہ خیال کیا جاتا ہے کہ دولت مند قومیں یا لوگ زمین پر سب سے زیادہ خوش ہیں لیکن ایک حالیہ سروے سے پتا چلا ہے کہ چھوٹے درجے کی کمیونٹیز میں رہنے والے کم آمدنی والے افراد اکثر زیادہ خوش رہتے ہیں۔

عالمی سروے کی قیادت کرنے والے سائنسدانوں نے پانچ براعظموں میں پھیلے 19 مقامات سے تقریباً 3000 افراد پر تحقیق کر کے اپنی معلومات اکٹھی کیں۔

اگرچہ ابتدائی طور پر اس مطالعے کا مقصد چھوٹے پیمانے پر کمیونٹیز پر موسمیاتی تبدیلیوں کے اثرات کا جائزہ لینا تھا جن میں سے اکثر مقامی تھے تاہم محققین نے یہ سوال بھی شامل کیا کہ لوگ اپنی زندگی سے کتنے مطمئن ہیں؟

معلومات اکٹھا کرنے کا یہ مرحلہ آسان نہیں تھا۔ محققین نے جن کمیونٹیز کا دورہ کیا وہ سب دور دراز تھے اور بعض اوقات انہیں جنوبی امریکا کے جنگلوں، جنوبی ایشیائی پہاڑوں اور افریقی گھاس کے میدانوں اور صحراؤں کو عبور کرنے کی ضرورت تھی۔ ٹیم نے سروے کا مقامی زبانوں میں ترجمہ بھی کیا اور 100 سے زیادہ چھوٹے دیہاتوں سے منتخب افراد کے انٹرویوز بھی کئے۔