مدھیہ پردیش: وزیر اعظم مودی آج اجین میں کریں گے ‘شری مہاکال لوک’ کا افتتاح

 اجین: وزیر اعظم نریندر مودی آج مدھیہ پردیش کے اجین میں واقع ‘مہاکالیشور مندر’ کے کئی ایکڑ میں تیار کردہ عظیم الشان کاریڈور کا افتتاح کرنے جا رہے ہیں۔ وزیر اعظم مودی کی آمد کے پیش نظر اجین کو پرکشش انداز میں سجایا گیا ہے اور سخت حفاظتی انتظامات کیے گئے ہیں۔

وزیر اعظم مودی گجرات سے فضائیہ کے خصوصی طیارے میں شام کو اندور پہنچیں گے، جہاں سے وہ ہیلی کاپٹر کے ذریعے اُجین جائیں گے۔ مودی شام 6 بجے شری مہاکال لوک کا افتتاح کریں گے۔ اس دوران مدھیہ پردیش کے گورنر منگو بھائی پٹیل، وزیر اعلیٰ شیوراج سنگھ چوہان، کئی مرکزی وزراء، ریاستی بھارتیہ جنتا پارٹی (بی جے پی) کے صدر وشنو دت شرما، متعددعہدیدار، ریاستی وزراء اورریاست کے کئی حصوں سے عام لوگ یہاں موجود ہوں گے۔

مودی اس موقع پر ایک اجتماع سے بھی خطاب کریں گے۔ اجین میں تقریباً دو گھنٹے گزارنے کے بعد مسٹرمودی اندور کے راستے دہلی واپس آئیں گے۔

دریں اثنا، وزیر اعظم مودی نے ایک ٹوئٹ میں لکھا، ”عقیدہ اور روحانیت کا مقدس شہر اُجین ایک تاریخی لمحے کا گواہ بننے جا رہا ہے۔ آج شام یہاں عظیم اور دویہ شری مہاکال لوک کو قوم کے نام وقف کرنے کا شرف حاصل ہوگا۔ ہر ہر مہادیو”