گجرات کے بھاونگر میں مدرسہ کی ہاسٹل عمارت منہدم، انتظامیہ کی وضاحت

بھاونگر (گجرات): میونسپل انتظامیہ نے اتوار کے روز آکوادا علاقے میں واقع ایک مدرسے کے ہاسٹل بلاک کو یہ الزام عائد کرتے ہوئے منہدم کردیا گیا کہ عمارت 24 میٹر چوڑی سڑک کی تعمیر میں رکاوٹ بن رہی تھی۔ کارروائی سینئر افسران اور کثیر پولیس نفری کی موجودگی میں انجام دی گئی۔

بھاونگر میونسپل کارپوریشن ( بی ایم سی) کے مطابق مدرسہ جامعہ عربیہ اسلامیہ دارالعلوم کی ہاسٹل عمارت قواعد کی خلاف ورزی کرتے ہوئے تعمیر کی گئی تھی اور دو برس قبل تعمیر مکمل ہونے کے باوجود سڑک عوام کے استعمال میں نہیں آ پا رہی تھی۔

افسران نے بتایا کہ پہلے مرحلے میں سڑک کے نقشے میں تبدیلی کرکے مدرسے کی مرکزی عمارت کو بچانے کی کوشش کی گئی تھی، لیکن ہاسٹل بلاک بدستور راستے میں حائل تھا جس کے باعث اسے ہٹانا ناگزیر ہوگیا تھا۔

بی ایم سی کمشنر ڈاکٹر نریندر مینا نے کہا کہ مدرسہ انتظامیہ کو پہلے ہی نوٹس جاری کیے گئے تھے اور تمام قانونی کارروائی مکمل کرنے کے بعد ہی مسماری کی گئی۔ ان کے مطابق کمیونٹی قائدین کو بھی تفصیلات سے آگاہ کر دیا گیا تھا۔