مہاراشٹر : سڑک حادثہ میں پانچ افراد جاں بحق ، آٹھ زخمی

اورنگ آباد،8 مارچ ؛مہاراشٹر کے خطہ مراٹھواڑہ کے ضلع بیڈ میں بیڈ -پرلی شاہراہ پر ایک ٹرک اور آٹو رکشہ میں ہونے والی ٹکر میں 5 افراد ہلاک اور 8 زخمی ہوگئے۔آٹو رکشہ سے ٹکر ہونے کے بعد ٹرک ایک ٹووہیلر اورایک فور وہیلر گاڑی سے ٹکرا گیا اور سڑک کے کنارے تالاب میں گر گیا۔

پولیس کے مطابق یہ سڑک حادثہ اتوار کی رات ساڑھے آٹھ بجے پیش آیا۔ پولیس نے بتایا کہ حادثے میں جاں بحق ہونے والوں میں دو بچے بھی شامل ہیں ، جو آٹو رکشہ سے تحصیل واڈوانی سے بیڈ جارہے تھے۔

پولیس افسر نے بتایا کہ آٹھ زخمیوں میں سے پانچ آ ٹو رکشہ میں سوارمیں تھے ، دو دیگر فور وہیلر میں سوار تھے اور دوسرا شخص ایک ٹو وہیلرپر سوار تھا۔انہوں نے بتایا کہ زخمیوں کو بیڈ کے سول اسپتال میں داخل کرایا گیا ہے۔

آفیسر نے بتایا کہ حادثے کے بعد ٹرک ڈرائیور موقع سے فرار ہوگیا۔ ہلاک ہونے والوں کی شناخت مدینہ پٹھان (30) ، تبسم پٹھان (40) ، ریحان پٹھان (10) ، تمنا پٹھان (8) اور سارہ ستار پٹھان (40) کے طور پر ہوئی ہے۔ یہ سب ضلع بیڈ کے شاہو نگر کے رہائشی تھے۔