کافی پینے کےطبّی فوائد

فرانس کے محققین کی ایک نئی تحقیق میں یہ بات سامنے آئی ہے کہ کافی انسان کے ہاضمے کو بہتر بناتی ہے۔رپورٹ کے مطابق، یہ نئی تحقیق پرانی 194 تحقیقات کا جائزہ ہے، جن میں کافی کے استعمال کے طبّی فوائد کے بارے میں تحقیق کی گئی ہے۔

اس تحقیق میں یہ بات سامنے آئی ہے کہ روزانہ 3 سے 5 کپ کافی پینا صحت کے لیے بالکل بھی تقصان دہ نہیں ہے بلکہ یہ پیٹ میں قدرتی طور پر موجود مفید جراثیم کی تعداد میں اضافہ کرتی ہے جو کہ انسان کے ہاضمےکے نظام کو بہتر بناتے ہیں۔

اتنا ہی نہیں کافی پینے سے بڑی آنت کے اختتامی حصے میں حرکت بہتر ہوتی ہے اور یوں فضلے کا اخراج بھی بہتر ہوجاتا ہےجس سے قبض ہونے کے امکان میں بھی کمی ہوتی ہے۔

کافی پینےسے لبلبے اور پِتّے کی کارکردگی میں بھی بہتری آتی ہے جس کی وجہ سے کئی غذاؤں کے ہضم ہونے میں آسانی ہوتی ہے۔

کافی کے طبّی فوائد میں جگر کے سرطان کے خدشہ میں کمی بھی شامل ہے جبکہ پِتّے میں پتھری بھی کم بنتی ہے۔

ایک تحقیق میں یہ بات بھی نوٹ کی گئی ہے کہ کافی پینے سے جگر کی کئی بیمایوں، دماغ کی شریانوں کے پھٹنے یا متاثر ہونے اور کچھ قسم کے سرطان پیدا ہونے کا خطرہ بھی کم ہوتا ہے۔

لیکن محققین کا یہ بھی کہنا ہے کہ صرف ایک تحقیق کی بنیاد پر یہ نہیں کہا جاسکتا کہ یہ کافی پینے ہی کی وجہ سے ہے کیونکہ انسان کی عمر، تمباکو نوشی اور ورزش کی عادات بھی صحت پر بہت اثر انداز ہوتی ہیں۔