ماہ صیام: مسجد الحرام کی چھت پر نمازوں کا اہتمام

ریاض: سعودی عرب میں رمضان المبارک کا چاند نظر نہیں آیا، جس کے بعد اعلان کیا گیا ہے کہ وہاں پہلا روزہ جمعرات کے روز ہوگا۔ اس سلسلے میں مسجد الحرام کی انتظامیہ کی جانب سے اعلان کیا گیا ہے کہ امسال مسجد کی چھت پربھی نمازوں کا اہتمام کیا جا رہا ہے۔

حرمین شریفین کے امور کی انتظامیہ کی جانب سے مسجد الحرام کی چھت پر نمازوں کے انتظام ہوتے ہی زائرین، نمازیوں، معتمرین خوشی کا اظہار کررہے ہیں۔

سعودی مقامی میڈیا کے مطابق حرمین شریفین کے امور کے سربراہ شیخ عبدالرحمن السدیس کی جانب سے اعلان کیا گیا ہے کہ ماہ صیام میں نمازیوں کی تعداد میں غیر معمولی اضافے کے پیش نظر مسجد الحرام کی چھت پر نمازوں کی ادائیگی کا اہتمام کردیا گیا ہے۔ انہوں نے کہا کہ اس سلسلے میں تمام آپریشنل اور تکنیکی خدمات فراہم کر دی گئی ہیں اور ماہ رمضان میں عبادت گزاروں اور معتمرین کی بڑی تعداد کو کنٹرول کرنے کے لیے خصوصی کیڈرز بھی تیار کیے گئے ہیں۔

علاوہ ازیں رمضان المبارک کے بابرکت مہینے کے اختتام پر مسجد الحرام میں شاہ فہد توسیع، پہلی منزل کے عقب اور ہال میں اعتکاف کے لیے 2500 مقامات تیار کیے گئے ہیں۔ اعتکاف کے لیے مختص مقامات پر معتکفین کے لیے تمام خدمات اور سہولیات فراہم کی گئی ہیں۔