’ممبئی ٹپ ٹپ برسا پانی جیسی ہوگئی‘

اگرچہ ماضی کی مقبول بولی وڈ فلم ’موہرا‘ کی ریلیز کو 25 برس ہوچکے ہیں، تاہم آج بھی اس فلم کے گانے مداحوں میں مقبول ہیں۔

تاہم گذشتہ روز بھارتی ریاست مہارا شٹر کے دارالحکومت ممبئی میں موسم گرما کی ہونے والی پہلی بارش کے بعد کئی فلمی شخصیات اور لوگوں کو بارش پر بنے بولی وڈ گانے یاد آئے اور ہر کسی نے اپنی خوشی کا اظہار کیا۔

جن شوبز شخصیات نے ممبئی میں بارش ہونے کے بعد اپنے جذبات کا اظہار کیا، ان میں ماضی کی ’مست گرل‘ روینہ ٹنڈن بھی شامل تھیں۔ روینہ ٹنڈن نے ممبئی میں بارش ہونے کے بعد دیگر فلموں کے گانے شیئر کرنے کے بجائے اپنی ہی ماضی کی مقبول فلم ’موہرا‘ کا گانا ’ٹپ ٹپ برسا پانی‘ شیئر کیا۔

ٹپ ٹپ برسا پانی پر اداکارہ کی شاندار پرفارمنس نے رنبیر کپور کو بھی حیران کردیا—اسکرین شاٹ
روینہ ٹنڈن نے نہ صرف اپنی فلم کے مقبول گانے کو شیئر کیا بلکہ انہوں نے اسی گانے پر کچھ عرصہ قبل ٹی وی شو پر کی جانے والی اپنی شاندار پرفارمنس کی ویڈیو شیئر کی جو دیکھتے ہی دیکھتے وائرل ہوگئی۔

روینہ ٹنڈن نے ممبئی میں بارش کے بعد ٹوئٹر پر ڈانس ریئلٹی شو ’سب سے بڑا کلاکار‘ میں کی جانے والی اپنی پرفارمنس کی ویڈیو شیئر کی۔