نجیب کی والدہ نے سی بی آئی کی کلوزر رپورٹ کے باوجود انصاف کےلئے جدوجہد کرنے کا عزم کیا

نئی دہلی: 2016 میں لاپتہ ہونے والے جے این یو کے طالب علم نجیب احمد کی والدہ فاطمہ نفیس نے منگل کو سی بی آئی اور دہلی پولیس پر اپنے بیٹے کے معاملے میں “لاپرواہی” کا الزام لگایا اور کہا کہ اگر انہیں انصاف کے لیے سپریم کورٹ کا دروازہ کھٹکھٹانا پڑے تو بھی وہ ایسا کریں گی۔

ایک فیس بک پوسٹ میں، انہوں نے کہا کہ وہ اپنی آخری سانس تک لڑیں گی۔ دہلی کی ایک عدالت نے پیر کو سنٹرل بیورو آف انویسٹی گیشن (سی بی آئی) کو نجیب احمد کے کیس کو بند کرنے کی اجازت دے دی۔

27 برس کے نجیب نئی دہلی کی جواہر لال نہرو یونیورسٹی میں ایم ایس سی بائیوٹیکنالوجی سال اول میں زیر تعلیم تھے، جب وہ اکتوبر 2016 میں اپنے ہاسٹل سے لاپتہ ہوئے۔

نفیس نے کہا کہ ان کی لڑائی صرف اپنے بیٹے کے لیے نہیں ہے بلکہ ہر اس ماں کے لیے ہے جو اپنے بچے کے لیے انصاف کی تلاش میں ہے۔ نفیس نے کہا کہ سب سے بڑی تفتیشی ایجنسیاں اور پورا عدالتی نظام بھی یہ نہیں بتا سکا کہ میرا بیٹا کہاں ہے۔

انہوں نے مزید کہا، “برسوں تک، میرے بیٹے کے بارے میں جھوٹ پھیلایا گیا۔ دہلی ہائی کورٹ نے بعد میں اس طرح کے تمام مواد کو ڈیجیٹل اور سوشل میڈیا پلیٹ فارمز سے ہٹانے کا حکم دیا۔”

نفیس، جو اپنے بیٹے کے معاملے میں منصفانہ جانچ کا مطالبہ کرنے کے لیے جے این یو کے طلباء کے ساتھ احتجاج میں سب سے آگے تھی، نے ان لوگوں کی تعریف کی جو ان کے ساتھ کھڑے تھے۔

سپریم کورٹ کے وکیل ڈاکٹر اے پی سنگھ کے مطابق، نجیب کی والدہ کلوزر رپورٹ کو چیلنج کرنے کے لیے قانونی راستے تلاش کر سکتی ہیں۔ انہوں نے کہا، “فاطمہ نفیس ایک احتجاجی پٹیشن کے ذریعے ڈسٹرکٹ سیشن کورٹ سے رجوع کر سکتی ہیں۔ وہ دہلی ہائی کورٹ میں ایک رٹ پٹیشن بھی دائر کر سکتی ہے اور سپریم کورٹ سے بھی رجوع کر سکتی ہے۔

” ڈاکٹر اے پی سنگھ نے مزید کہا کہ سی بی آئی 8 سالوں میں نجیب کا کوئی سراغ نہیں لگاسکی۔ نہ ہی اس کے زندہ یا مردہ ہونے کا کوئی ثبوت جمع ملا۔ سی بی آئی نے اپنی کلوزر رپورٹ راؤس ایونیو کورٹ میں داخل کی اور عدالت نے اسے قبول کر لیا۔ ان کا مزید کہنا تھا کہ سب کو حق ہے کہ وہ سپریم کورٹ تک انصاف کے لیے اپنی جنگ لڑے۔

نجیب احمد 15 اکتوبر 2016 کی رات یونیورسٹی کے ماہی مانڈوی ہاسٹل سے مبینہ طور پر اکھل بھارتیہ ودیارتھی پریشد سے وابستہ کچھ طلباء کے ساتھ جھگڑے کے بعد لاپتہ ہو گئے تھے۔

اس کیس کی ابتدائی تحقیقات دہلی پولیس نے کی اور بعد میں اسے سی بی آئی کو منتقل کیا گیا۔ سی بی آئی نے اکتوبر 2018 میں اس معاملے کی تحقیقات بند کردی تھیں کیونکہ نجیب احمد کا سراغ لگانے کی کوششوں کا کوئی نتیجہ نہیں نکلا۔ ایجنسی نے دہلی ہائی کورٹ سے اجازت ملنے کے بعد اپنی کلوزر رپورٹ داخل کی۔