ناسا پھنسے ہوئے خلابازوں کو جلد از جلد واپس لائے گا

 لاس اینجلس، 30 جنوری (یو این آئی ) امریکی خلائی ایجنسی ناسا نے بدھ کو کہا کہ وہ ایجنسی کے پھنسے ہوئے خلاباز سنی ولیمز اور بوچ ولمور کو ’’جتنی جلدی   ممکن ہوگا‘‘ بحفاظت گھر واپس لانے کے لیے اسپیس ایکس کے ساتھ مل کر کام کر رہا ہے۔

ناسا نے ایکس پر کہا کہ ’’ناسا اور اسپیس ایکس ایجنسی کے اسپیس ایکس کریو-9 خلابازوں سنی ولیمز اور بوچ ولمور کو جلد از جلد بحفاظت واپس لانے کے لیے کام کر رہے ہیں، اور  ساتھ ہی مشنوں کے درمیان ہینڈ اوور کو مکمل کرنے کے لیے کریو-10 کے  لانچ کی بھی تیاری کررہے ہیں۔

ناسا اور اسپیس ایکس مارچ 2025 کے آخر میں کریو 10 کو بین الاقوامی خلائی اسٹیشن (آئی ایس ایس ) کے لیے لانچ کرنے کا ہدف بنا رہے ہیں۔

ایجنسی کا اسپیس ایکس کریو-9 مشن ناسا کے خلاباز نک ہیگ، سنی ولیمز، بوچ ولمور اور روسکوسموس کے خلاباز الیگزینڈر گوربونوف کے ساتھ کریو-10 کی مشن آربیٹل لیبارٹری  میں آمد کے بعد زمین پر واپس آئے گا۔

ولیمز اور ولمور گزشتہ سال جون سے بوئنگ کے اسٹار لائنر کے ساتھ تکنیکی مسائل کی وجہ سے خلا میں پھنسے ہوئے ہیں جو انہیں آئی ایس ایس تک لے گیا تھا۔

ناسا کا پچھلا منصوبہ انہیں فروری میں واپس لانے کا  تھا۔ لیکن کریو 10 کے نئے لانچ شیڈول کا مطلب ہے کہ دونوں خلاباز کم از کم ایک ماہ مزید خلا میں رہیں گے۔