نئی تحقیق: دنیا بھر میں سمندری سطح اندازوں سے تقریباً ایک فٹ زیادہ بلند

واشنگٹن: حالیہ سائنسی تحقیق میں انکشاف ہوا ہے کہ دنیا بھر میں سمندروں کی سطح بعض سابقہ اندازوں کے مقابلے میں تقریباً ایک فٹ زیادہ بلند ہوچکی ہے، جس کے باعث ساحلی علاقوں میں سیلاب کے خطرات پہلے سے کہیں زیادہ سنگین ہوسکتے ہیں۔

مارچ دو ہزار چھبیس میں شائع ہونے والی ایک نئی تحقیق کے مطابق ماضی میں سمندری سطح کے حوالے سے کی جانے والی متعدد مطالعات میں اندازوں میں نمایاں فرق پایا گیا ہے۔ تحقیق کرنے والے ماہرین نے دنیا بھر میں ہونے والی سینکڑوں سائنسی تحقیقات کا تفصیلی جائزہ لیا۔

محققین کے مطابق تقریباً نوّے فیصد مطالعات میں ساحلی پانی کی اصل اونچائی کو اوسطاً ایک فٹ کم سمجھا گیا تھا۔ اس کا مطلب یہ ہے کہ کئی ساحلی علاقوں میں سمندر کی سطح درحقیقت اس سے زیادہ بلند ہے جتنا سائنسدان پہلے تصور کرتے رہے تھے۔

تحقیق کے مطابق اس غلطی کی بڑی وجہ پیمائش کے مختلف طریقے ہیں۔ زمین کی سطح کی اونچائی اور سمندر کی سطح کو ماضی میں الگ الگ طریقوں سے ناپا جاتا رہا جس کے باعث ڈیٹا میں فرق پیدا ہوا۔ اس فرق کے نتیجے میں ساحلی علاقوں میں پانی کی اصل سطح کم ظاہر ہو رہی تھی۔

دوسری جانب سائنسدانوں نے سمندر کی سطح میں اضافے کی بڑی وجوہات میں عالمی حدت یا گلوبل وارمنگ کو قرار دیا ہے،اس کے علاوہ بعض ساحلی علاقوں میں زمین کے بتدریج دھنسنے کا عمل بھی سمندری سطح کے بلند نظر آنے کی ایک وجہ قرار دیا جا رہا ہے، جس کے باعث مستقبل میں ساحلی بستیوں کے لیے خطرات مزید بڑھ سکتے ہیں۔