خطاب میں مہنگائی، بے روزگاری اور عام لوگوں کے مسائل کا کوئی ذکر نہیں: کانگریس

نئی دہلی،  2 جولائی (یو این آئی) کانگریس نے راجیہ سبھا میں منگل کو کہا  کہ صدر کے خطاب میں مہنگائی، روزگار، سرحدی سلامتی اور عام آدمی کے مسائل  کا کوئی ذکر نہیں ہے۔

ایوان میں کانگریس کے ڈپٹی لیڈر پرمود تیواری نے کہا کہ یہ خطاب ’تھکا ہوا، شکست خوردہ اور پہلے سے کم‘  ہوا ہے۔ حکومت کو انتخابی نتائج پر سنجیدگی سے غور کرنا چاہیے اور اس کا  جائزہ لینا چاہیے۔ انہوں نے کہا کہ صدر کے خطاب میں 40 سال کی ریکارڈ مہنگائی کا کوئی ذکر نہیں ہے۔ کانگریس کے رکن نے منی پور تشدد کا ذکر کرتے ہوئے کہا کہ حکومت کی  اس پر مسلسل خاموش  برقرار ہے۔
انہوں نے کہا کہ مودی حکومت نے پچھلے 10 سالوں میں کئے گئے وعدوں کو پورا نہیں کیا۔ نوجوانوں کو روزگار نہیں دیا گیا۔ مینوفیکچرنگ سیکٹر میں فیکٹریاں بند ہو رہی ہیں۔ پیٹرول، ڈیزل اور تیل کی قیمتوں میں مسلسل اضافہ ہورہا ہے۔ انہوں نے کہا کہ گنگا صفائی مہم کے نام پر دھوکہ ہوا ہے۔
مسٹر تیواری نے کہا کہ بلٹ ٹرین کا وعدہ پورا نہیں ہوا۔ کسانوں کو مناسب قیمت نہیں دی جا رہی۔ انہوں نے الزام لگایا کہ انتخابی بانڈز کے نام پر دھوکہ دہی کی گئی ہے۔ یہ سب سے بڑی دھوکہ دہی ہے۔ ایسی  کمپنیوں سے فنڈ لیا گیا جنہوں نے عوام کی صحت سے کھلواڑ کیا ہے۔
اس سے پہلے  آسام گن  پریشد کے ویریندر پرساد ویشے نے صدر کے خطاب پر شکریہ کی تحریک پر بحث کا دوبارہ آغاز کرتے ہوئے کہا کہ ملک کی ترقی میں سب کو تعاون کرنا چاہئے اور ترقی کے لئے پارٹی کی سیاست سے بالاتر ہونا چاہئے۔ انہوں نے کہا کہ ترقی کے ثمرات ملک کے دور دراز علاقوں تک پہنچانے کے لیے سب کو ساتھ آنا ہو گا۔
بھارتیہ جنتا پارٹی کے اشوک راؤ شنکر راؤ چوان نے کہا کہ آئین کو تبدیل کرنے کا تصور غلط ہے، لیکن یہ بنا دیا گیا ہے۔ انہوں نے کہا کہ پارلیمنٹ میں تمام لیڈروں کو حقائق اور سچائی کے ساتھ بات کرنی چاہئے کیونکہ پورا ملک اس پر اعتماد کرتا ہے۔ پارلیمنٹ میں عظیم شخصیات کے مجسمے نصب ہونے پر بھی ایسا ہی تاثر پیدا کیا جارہا ہے۔
مسٹر  چوہان نے کہا کہ اس میں کوئی شک نہیں ہے کہ نیٹ امتحان میں بے ضابطگیاں ہوئی ہیں اور اس کی جانچ ہونی چاہیے۔ انہوں نے کہا کہ تمام امتحانات میں بنیادی تبدیلیوں کی ضرورت ہے جس سے   طلباء اور والدین محفوظ رہ سکیں۔ اس پر ایوان میں گہرائی سے بحث ہونی چاہئے۔

ترنمول کانگریس کے محمد ندیم الحق نے کہا کہ صدر کے خطاب میں قومی جمہوری اتحاد کی حکومت کے بجائے واضح اکثریت والی حکومت لکھا گیا ہے، جو حقیقتاً درست نہیں ہے۔ ملک میں بے روزگاری اور این ای ای ٹی پیپر لیک کے معاملے کا ذکر کرتے ہوئے انہوں نے کہا کہ ملک کے نوجوان پریشان ہیں۔ انہوں نے کہا کہ وزیر اعظم نریندر مودی نے لوک سبھا انتخابی مہم کے دوران الیکشن کمیشن کے تمام ضابطوں اور ہدایات کی خلاف ورزی کی۔ ترنمول رکن نے مرکزی حکومت پر ریاست میں منریگا کارکنوں کے واجبات کی ادائیگی کے لیے رقم فراہم نہ کرنے کا بھی الزام لگایا۔

این ای ای ٹی پیپر لیک کا مسئلہ اٹھاتے ہوئے وائی ایس آر کانگریس کے وائی وی سبا ریڈی نے کہا کہ اس سے نوجوانوں کی مشکلات میں اضافہ ہوا ہے۔ انہوں نے مطالبہ کیا کہ کسانوں کو ان کی فصلوں کی کم سے کم امدادی قیمت دی جائے۔ ریلوے حادثات پر تشویش کا اظہار کرتے ہوئے انہوں نے حکومت سے مسافروں کی حفاظت کے لیے اقدامات کرنے کا مطالبہ کیا۔ انہوں نے آندھرا پردیش کے لوگوں کے لیے راحت اور امدادی پیکج کا بھی مطالبہ کیا۔ انہوں نے پولاورم پروجیکٹ کی جلد از جلد تکمیل کا مطالبہ بھی کیا۔
ڈی ایم کے کے پی ولسن نے بھی این ای ای ٹی کے سوالیہ پرچوں کے لیک ہونے کا مسئلہ اٹھاتے ہوئے کہا کہ تمل ناڈو نے شروع سے ہی اس اسکیم کی مخالفت کی ہے کیونکہ اس سے امیدواروں پر منفی ذہنی اثر پڑ رہا ہے۔ انہوں نے کہا کہ ریاستی حکومت نے اس سلسلے میں ایک بل پاس کیا ہے، لیکن یہ ابھی تک صدر کے پاس زیر التوا ہے۔ تمل ناڈو اسمبلی نے ایک قرارداد منظور کی ہے جس میں اس امتحان کو ختم کرنے اور تمل ناڈو کو این ای ای ٹی سے استثنیٰ دینے کا مطالبہ کیا گیا ہے۔ انہوں نے ملک میں ذات پات کی مردم شماری کرانے کا بھی مطالبہ کیا۔
عام آدمی پارٹی کے سندیپ کمار پاٹھک نے کہا کہ صدر کے خطاب میں کوئی ویژن نہیں ہے اور یہ پوری طرح سے کھوکھلا ہے۔ کسی بھی موضوع پر تفصیل سے کچھ نہیں کہا گیا۔ یہ انا اور نفرت سے بھرا ہوا ہے۔ انہوں نے الزام لگایا کہ چیف الیکشن کمشنر کی تقرری میں شفافیت کا فقدان ہے۔ انہوں نے الزام لگایا کہ بی جے پی متعصبانہ ہو کر انتخابی بانڈ حاصل کر رہی ہے۔ انہوں نے بی جے پی پر الزام لگایا کہ مختلف ریاستوں میں الیکشن ہارنے کے بعد انہوں نے جوڑ توڑ کے ذریعے ان ریاستوں میں حکومتیں بنائیں۔ مسٹر پاٹھک نے دہلی کے وزیر اعلی اروند کیجریوال پر جانبداری کی بنیاد پر جیل بھیجنے کا بھی الزام لگایا۔ انہوں نے الزام لگایا کہ تحقیقاتی ایجنسیاں مرکزی حکومت کے کہنے پر کام کر رہی ہیں۔ انہوں نے دہلی کا پانی روکنے کا معاملہ بھی اٹھایا۔
بیجو جنتا دل کے مجیب اللہ خان نے قوم کو سیاست سے بالاتر رکھنے کی اہمیت کا ذکر کرتے ہوئے کہا کہ سیاست ایمانداری سے کرنی چاہیے۔ انہوں نے کہا کہ اب پالیسی کے بغیر سیاست کی جا رہی ہے۔ سابق وزیر اعظم چرن سنگھ اور بہار کے سابق وزیر اعلی کرپوری ٹھاکر کی مثال دیتے ہوئے انہوں نے کہا کہ انہوں نے ایمانداری کی سیاست کی۔ انہوں نے اڈیشہ کو خصوصی درجہ دینے کا بھی مطالبہ کیا۔ انہوں نے آئین کے دیباچے میں لفظ عدم تشدد کو شامل کرنے کا بھی مطالبہ کیا۔