عالمی منڈی میں تیل کی قیمتیں 119ڈالرسے89.67 ڈالرفی بیرل تک آگئیں

آبنائے ہرمز کی ممکنہ بندش اور تیل تنصیبات پر حملوں کے اثرات کے باعث عالمی منڈی میں خام تیل کی قیمتوں میں ایک ہی دن میں تقریباً 30 فیصد کا نمایاں اضافہ دیکھا گیا، تاہم جی 7 ممالک کی جانب سے ہنگامی ذخائر استعمال کرنے کے اشاروں کے بعد قیمتوں میں کمی آنا شروع ہوگئی۔

پیر کے روز کاروبار کے دوران برطانوی خام تیل برینٹ کی قیمت فی بیرل 21.25 ڈالر اضافے کے ساتھ 119.50 ڈالر تک پہنچ گئی، جبکہ امریکی خام تیل ڈبلیو ٹی آئی کی قیمت بھی 21 ڈالر اضافے کے بعد 119.48 ڈالر فی بیرل ہوگئی۔

امریکی اخبار کے مطابق کورونا وبا کے بعد پہلی مرتبہ عالمی منڈی میں خام تیل کی قیمت 100 ڈالر فی بیرل سے تجاوز کرگئی ہے۔

دوسری جانب تیل کی قیمتوں میں اضافے کو قابو میں رکھنے کے لیے جی 7 ممالک متحرک ہوگئے ہیں اور انہوں نے خام تیل کے ہنگامی ذخائر استعمال کرنے کی تجویز پیش کی ہے، جس کے بعد عالمی منڈی میں قیمتوں میں کمی کا رجحان دیکھا جا رہا ہے۔

اس سلسلے میں فرانس کی زیر صدارت جی 7 ممالک کے وزرائے خزانہ کا ایک ورچوئل اجلاس ہوا جس میں قیمتوں کو مستحکم رکھنے کے لیے تیل کے ہنگامی ذخائر استعمال کرنے کی تجویز پر غور کیا گیا۔

خبر ایجنسی کے مطابق ابھی تک ہنگامی ذخائر کے استعمال کا حتمی فیصلہ نہیں کیا گیا، تاہم مارکیٹ کو مستحکم رکھنے کے لیے ہر ممکن اقدام کرنے پر اتفاق کیا گیا ہے۔

فرانسیسی وزیر خزانہ کے مطابق ضرورت پڑنے پر ذخائر جاری کرنے کا امکان بھی زیر غور ہے اور صورتحال پر گہری نظر رکھی جا رہی ہے، جبکہ یورپ اور امریکا میں فی الحال ایندھن کی فراہمی کا کوئی مسئلہ نہیں ہے۔

اجلاس میں عالمی توانائی ایجنسی (آئی ای اے) کے سربراہ نے بتایا کہ تمام ممکنہ آپشنز پر غور کیا گیا جن میں آئی ای اے کے تیل کے ہنگامی ذخائر کا استعمال بھی شامل ہے۔

انہوں نے بتایا کہ آئی ای اے کے رکن ممالک کے پاس اس وقت ہنگامی استعمال کے لیے 1.2 ارب بیرل سے زائد سرکاری تیل کے ذخائر موجود ہیں، جبکہ اس کے علاوہ تقریباً 600 ملین بیرل تیل صنعتی ذخائر کی صورت میں بھی حکومتوں کی نگرانی میں رکھا گیا ہے۔

اس سے قبل 2022 میں روس کے یوکرین پر حملے کے بعد عالمی منڈی کو سہارا دینے کے لیے بھی ان ذخائر کا استعمال کیا گیا تھا۔

غیر ملکی میڈیا کے مطابق جی 7 ممالک کی جانب سے ہنگامی ذخائر استعمال کرنے کے اشاروں کے بعد عالمی منڈی میں تیل کی قیمتیں دوبارہ کم ہونا شروع ہوگئی ہیں۔ برطانوی خام تیل برینٹ جو ایک موقع پر 119.50 ڈالر فی بیرل تک پہنچ گیا تھا، اب کم ہو کر 89.67 ڈالر فی بیرل پر ٹریڈ کر رہا ہے۔