اومیش پال قتل معاملہ: عتیق احمد کے قریبی خالد ظفر کے خلاف کارروائی، بلڈوزر کے ذریعے گھر کیا گیا مسمار

 الہ آباد (پریاگ راج): امیش پال قتل معاملہ میں سابق رکن پارلیمنٹ عتیق احمد کے قریبیوں پر کارروائی کا سلسلہ شروع ہو گیا ہے۔ اسی ضمن میں بدھ (یکم مارچ) کو الہ آباد میں واقع عتیق احمد کے ایک قریبی معاون خالد ظفر کے گھر کو انتظامیہ نے بلڈوزر کے ذریعے مسمار کر دیا گیا۔

عتیق احمد کی رہائش کے قریب موجود خالد ظفر کی عمارت کو غیر قانونی قرار دے کر پریاگ راج ڈیولپمنٹ اتھارٹی نے اس کارروائی کو انجام دیا۔

پریاگ راج ڈیولپمنٹ اتھارٹی کا الزام ہے کہ خالد ظفر کا تقریباً 200 مربع گز کا دو منزلہ مکان بغیر نقشہ منظور کرائے تعمیر کرایا گیا ہے۔ پی ڈی اے کا کہنا ہے کہ ظفر کو آٹھ سال قبل نوٹس جاری کیا گیا تھا لیکن وہ اپنا موقف پیش کرنے کے لئے کبھی نہیں پہنچا۔

پی ڈی اے کے سکریٹری اجیت سنگھ کے مطابق ظفر نے نوٹس کا جواب نہیں دیا اس لئے ڈیڑھ سال قبل مکان کو گرانے کا حکم جاری کیا گیا تھا، اسی کے تحت یہ کارروائی کی جا رہی ہے۔

خیال رہے کہ بی ایس پی کے زیر بحث رکن اسمبلی راجو پال قتل معاملہ کے اہم گواہ اومیش پال کو جمعہ (24 فروری) کی شام گولی مار کر ہلاک کر دیا گیا تھا۔ ان کی حفاظت پر مامور دو محافظ بھی شدید زخمی ہوگئے تھے، جن میں سے ایک کی موت واقع ہو گئی۔ واقعہ کے بعد حملہ آور موٹر سائیکل پر فرار ہو گئے۔