اربعین حسینی کے موقع پر آستان قدس رضوی زائرین کی خدمت میں پیش پیش

حرم رضوی سے وابستہ کرامت رضوی فاؤنڈیشن کے منیجنگ ڈائریکٹر نے بتایا کہ آستان قدس رضوی ایرانی وغیرملکی زائرین کو بہتر خدمات فراہم کرنے کے لئے مشہد مقدس کے لوگوں کی جانب سے عراق میں لگائے جانے والے چالیس موکبوں کو مالی و معنوی امداد فراہم کر رہا ہے ۔

چہلم امام حسینؑ پر لگائے جانے والے موکبوں کو نذرانہ پیش کرنے کے لئے ایک خصوصی اجلاس مشہد میں منعقد کیا گیا جس میں عراق کے اندر لگائے جانے والے چالیس ایرانی موکبوں کے سربراہ بھی موجود تھے۔

کرامت رضوی فاؤنڈیشن کے منیجنگ ڈائریکٹر محمد حسین استاد آقا نے کہا کہ کرامت رضوی فاؤنڈیشن کے تعاون سے اربعین حسینی کے زائرین کے لئے دس سے زیادہ سرحدی علاقوں میں اور پندرہ سے زیادہ ملک کے دیگر حصوں میں ایرانی و غیرملکی زائرین کی پذیرائی کے لئے موکب لگائے گئے ہیں۔

انہوں نے بتایا کہ گذشتہ برسوں کی طرح آستان قدس رضوی کا مرکزی موکب صوبہ ایلام کے مہران بارڈر پرلگایا گیا ہے، مجموعی طور پر ان موکبوں میں چھ لاکھ سے زیادہ غذا اور دس لاکھ سے زیادہ برف کی سلّیاں تقسیم کی جائيں گي۔

کرامت رضوی فاؤنڈیشن کے منیجنگ ڈائریکٹر نے مزید کہا کہ حرم امام رضا(ع) کے خادموں کے تعاون سے صوبہ سیستان و بلوچستان میں میرجاوہ اور ریمدان بارڈر، صوبہ خراسان رضوی میں دوغارون بارڈر، صوبہ گیلان میں آستارا را بارڈر، صوبہ اردبیل میں بیلہ سوار بارڈر، مغربی آذربائیجان میں تمرچین بارڈر، صوبہ کرمانشاہ میں خسروی بارڈراور صوبہ خوزستان میں شلمچہ اور چذابہ بارڈر پر ایرانی اور غیرملکی زائرین منجملہ افغانستانی اور پاکستانی زائرین کے لئے موکب لگائے گئے ہیں جہاں پر زائرین کو مختلف خدمات فراہم کی جائیں گی۔

محمد حسین استاد آقا کے مطابق ملک کے سرحدی علاقوں میں لگائے جانے والے موکبوں کے علاوہ مشہد مقدس کی جانب سے عراق کے مختلف شہروں جیسے کربلا، سامرا اور کاظمین وغیرہ میں چالیس سے زائد موکب لگائے گئے ہیں ،جن میں زائرین اربعین کو تین وقت کا کھانا اور پانی فراہم کرنے کے ساتھ زائرین کو دیگر خدمات بھی فراہم کی جائیں گی۔

انہوں نے بتایا کہ حرم امام رضا علیہ السلام کے متولی کے حکم پر ان موکبوں کو آستان قدس رضوی کی طرف سے ہر طرح کی مالی و معنوی امداد فراہم کی جائے گی۔

محمد استاد آقا نےعراق میں غذائی اجناس کی مہنگائی اور شدید گرمی کا ذکر کرتے ہوئے کہا کہ سقائے اربعین کے نام سے’’#نذر_آب‘‘ ہیشٹیگ اور کیمپین کے تحت مخیر حضرات کے تعاون سے دس لاکھ سے زائد منرل واٹر اور پچاس ہزار برف کے بلاک مختلف موکبوں کو فراہم کئے جائیں گے جوعراق میں تعینات موکبوں کے ذریعہ زائرین میں تقسیم کئے جائیں گے۔ انہوں نے بتایا کہ اربعین امام حسین(ع) کے موقع پر شہرا سامرا میں لگائے گئے زیادہ تر موکب ایرانی ہیں اور اس سال شدید گرمی پیش نظر موکبوں کے درمیان بڑی مقدار میں پانی اور برف کی سلّياں یا بلاک تقسیم کئے جائیں گے۔

کرامت رضوی فاؤنڈیشن کے منیجنگ ڈائریکٹر نے بتایا کہ چہلم امام حسین علیہ السلام کے ایّام شروع ہوتے ہی حرم امام رضا علیہ السلام کے پچاس سے زائد خادم حرم مطہر رضوی کی خدمت کا مخصوص لباس پہن کرعراق جائیں گے جہاں پر زائرین کو خدمات فراہم کرنے والے موکبوں اور ان کے سربراہوں کی قدر دانی کرنے کے ساتھ ساتھ انہیں حرم رضوی کی جانب سے قیمتی تحائف سے بھی نوازیں گے۔

اجلاس کے اختتام پر چالیس موکبوں کے سربراہوں نے غذائی اجناس اور سامان کا ٹوکن وصول کرنے کے بعداپنے اپنے موکبوں کے لئے سامان وصول کیا۔