چوری کئے تانبے کے تار سمیت ایک گرفتار دو ملزم فرار

دیوبند : پولیس نے ایک شخص کوکسانوں کے کھیتوں میں لگائے گئے ٹیوب ویل کی موٹر سے چوری کئے گئے کاپر کے تین کلو تار سمیت گرفتار کیا ہے۔ جبکہ اس کے دو ساتھی موقع سے فرار ہو گئے۔

پولیس کے مطابق گرفتار ملزم نے علاقے میں مختلف مقامات پر چوری کی وارداتوں کا اعتراف کیا ہے۔دیوبندکوتوالی انچارج سنجیو کمار نے بتایا کہ گنگوہ روڈ پرواقع گاؤں جھبیرن کے قریب چیکنگ کے دوران پولیس نے سامنے سے آنے والے تین مشتبہ افراد کو رکنے کا اشارہ کیاتو مذکورہ لوگ بھاگنے لگے جس پر پولیس نے پیچھا کرکے ایک شخص کو پکڑ لیا۔

تلاشی کے دوران پکڑے گئے ملزم سے تین کلو تانبے کی تار اورموٹر کھولنے کے اوزار برآمد ہوئے ۔ پوچھ گچھ کے دوران ملزم نے بتایا کہ اس نے اپنے دو ساتھیوں کے ساتھ مل کر گائوں بڈھیڈی اورکرڑی سمیت آٹھ دس ٹیوب ویلوں سے موٹریںتوڑ پھوڑ کر ان میں لگا کاپر کا تار چوری کرنے کا کام کیا ہے ۔

گرفتار ملزم نے اپنا نام دیپک بتایا ہے جو کہ گاؤں لبکری کا رہائشی ہے۔ پولیس اس کے دونوں مفرور ملزمان کی تلاش کر رہی ہے۔ پولیس نے عدالت کی ہدایت پر گرفتار ملزم کو جیل بھیج دیاہے۔