کولگام میں جاری مسلح تصادم میں اب تک ایک جنگجو کو ہلاک کیا ہے: آئی جی پی کشمیر

سری نگر، 13 اگست (؛ کشمیر زون پولیس کے انسپکٹر جنرل وجے کمار کا کہنا ہے کہ جنوبی ضلع کولگام کے مالپورہ میں جاری مسلح تصادم میں اب تک ایک جنگجو کو مارا گیا ہے۔
انہوں نے کہا: ‘اب تک ایک دہشت گرد کو مارا گیا ہے۔ عمارت، جس میں جنگجووں نے پناہ لی تھی، کی مکمل تلاشی لینا ابھی باقی ہے’۔

File Photo

واضح رہے کہ جنگجووں نے جمعرات کو سہ پہر کے وقت کولگام میں سری نگر – جموں قومی شاہراہ پر بی ایس ایف کی ایک کانوائے پر حملہ کر دیا جس کے بعد سکیورٹی فورسز نے ان کو محاصرے میں لیا۔

آئی جی پی کے مطابق: ‘دہشت گردوں نے کولگام میں قومی شاہراہ پر بی ایس ایف کی ایک کانوائے پر فائرنگ کی۔ اس میں بی ایس ایف کا کوئی نقصان نہیں ہوا۔ تاہم دہشت گرد پھنس کر رہ گئے ہیں’۔
ان کا مزید کہنا تھا: ‘سکیورٹی فورسز کے محاصرے میں پھنسنے والے جنگجووں کا تعلق لشکر طیبہ سے ہے۔ فائرنگ کے تبادلے میں سکیورٹی فورسز کے دو اہلکار اور دو عام شہری زخمی ہوئے ہیں۔ ہم چاہتے ہیں کہ کم از کم نقصان ہو کیوں کہ جس عمارت میں جنگجو چھپے بیٹھے ہیں وہ ایک بہت بڑی عمارت ہے’۔

اس دوران کولگام پولیس نے ایک ٹویٹ میں کہا کہ مالپورہ، جہاں مسلح تصادم ہو رہا ہے، سے 22 عام شہریوں بشمول 12 دکانداروں، 6 خواتین اور 4 غیر مقامی مزدوروں کو بحفاظت نکال کر محفوظ جگہوں پر منتقل کیا گیا ہے۔