مکئی کے کھیت کے مچان پر بیٹھ کر آن لائن تعلیم

حیدرآباد۔ ایک ایسے وقت جب بیشتر طلبہ آن لائن تعلیم کے لئے جدوجہد کررہے ہیں،اس لڑکی کا تعلیم کے تئیں جوش وجذبہ متاثر کن ہے کیونکہ یہ لڑکی مکئی کے کھیت میں لگائے گئے مچان پر بیٹھ کر آن لائن تعلیم حاصل کررہی ہے ۔تلنگانہ کے تلنگانہ مائناریٹی ریزیڈنشیل اسکول، نرمل کی طالبہ صفازرین کی کھیت میں لگائے گئے مچان پر آن لائن تعلیم حاصل کرنے کی تصویر سوشیل میڈیا پر کافی تیزی سے وائرل ہوگئی۔

اس طرح اس لڑکی نے لوگوں کے دل جیت لئے ۔زرین ضلع نرمل کے راجورہ گاوں سے تعلق رکھتی ہے ۔نٹ ورکس سگنل اور تکنیکی مسائل کا گاوں کے لوگوں کو سامنا ہے تاہم ان رکاوٹوں نے زرین کے جذبہ کو کم نہیں کیا ہے ۔اس نے مچان میں بیٹھ کر آن لائن تعلیم حاصل کرنے کا فیصلہ کیا جو اس کے حق میں مناسب ثابت ہوا۔تلنگانہ کے تقریبا 14لاکھ طلبہ آن لائن کلاسس کے ذریعہ تعلیم حاصل کررہے ہیں۔یہ لڑکی آن لائن تعلیم کے لئے دو کیلو میٹر جا کر اس آن لائن طریقہ کار کے ذریعہ تعلیم حاصل کررہی ہے جو قابل ستائش قدم ہے ۔اس لڑکی کا کہنا ہے کہ اس کی اسی طرح آن لائن کلاسس میں حاضری کا ایک ماہ ہوگیا ہے ۔اتنی کم عمری میں ہی یہ لڑکی کام اور اپنے مقاصد پر توجہ مرکوز کی ہوئی ہے ۔