رائے بریلی کے لوگوں نے نا انصافی کے خلاف ہمیشہ جدو جہد کی ہے :پرینکا

کانگریس جنرل سکریٹری پرینکا گاندھی نے کہا کہ رائے بریلی سے ان کا دل کا ناطہ ہے اور یہ لوک سبھا حلقہ جمہوریت کا مضبوط پہرے دار ہے۔

گاندھی خاندان کے قریبی دوست اور پارٹی امیدوار کشوری لال شرما کے امیٹھی پارلیمانی حلقہ میں انتخابی اسٹیئرنگ کمیٹی کی میٹنگ میں شرکت کے بعد بھائی اور پارٹی امیدوار راہل گاندھی کے پارلیمانی حلقے رائے بریلی میں بلاک سطح کے کارکنوں کی میٹنگ میں کہا’ہم سب میں ایک چیز مشترک ہے کہ ہم نے ہمیشہ ناانصافی کے خلاف جدوجہد کی ہے اور اس جدوجہد کی تاریخ 100 سال سے زیادہ ہے۔

جنوری 1921 میں، جب بابا رام چندر اور مداری پاسی جی کی قیادت میں اودھ کی کسان تحریک اپنے عروج پر تھی، پنڈت جواہر لال نہرو اس میں حصہ لینے آئے تھے۔وہ پہلی بار رائے بریلی کی مقدس سرزمین پر برطانوی سلطنت کے خلاف لڑتے ہوئے گرفتار ہوئے تھے۔

تب سے اس سر زمین سے جڑ کر خدمت اور جدوجہد کی مہم جاری ہے۔ رائے بریلی کے راہل اب آپ کے تعاون اور آشیرواد سے سو سال کی خدمت کے اس سفر کو آگے بڑھائیں گے۔

انہوں نے مودی حکومت کو ہدف تنقید بناتے ہوئے کہا’آج ملک میں برطانوی راج جیسے حالات ہیں۔ مودی حکومت کی پالیسیاں غریبوں کو ذہن میں رکھ کر نہیں بن رہی ہیں بلکہ ارب پتیوں کو فائدہ پہنچانے کے لیے بنائی گئی ہیں۔ بین الاقوامی رپورٹس بتاتی ہیں کہ آج ہندوستان میں عدم مساوات کی حالت انگریزوں کے دور سے بھی بدتر ہے۔

جمہوریت کو مضبوط کرنے والے تمام اداروں کو کمزور کیا جا رہا ہے۔ مہاتما گاندھی، پنڈت نہرو نے لوگوں کے حقوق کو مضبوط کرنے کے لیے انگریزوں کے خلاف جنگ لڑی تھی،

انہیں کم ہی معلوم تھا کہ آزاد ہندوستان میں ایک دن آئے گا جب حکومت عوام کو ان کے حقوق سے محروم کرنے کو آمادہ ہوجائے گی۔

انہوں نے کہا کہ آئین کو تبدیل کرنے کی کوشش کی جا رہی ہے جو ریزرویشن جیسا نظام فراہم کرتا ہے جس سے کروڑوں لوگوں کی زندگیاں بدل گئی ہیں۔

ہم نے ہمیشہ ترقی کو ترجیح دی ہے اور ایک ترقی یافتہ اور خوشحال رائے بریلی کا خواب دیکھا ہے۔جب ہمیں موقع ملا تو ہم نے رائے بریلی میں روزگار اور ترقی کے مواقع پیدا کیے لیکن مودی سرکار نے ہمارے شروع کیے گئے بہت سے پروجیکٹوں کو یا تو بند کر دیا یا ان کو اپنے نام پر فروغ دیا۔

مودی حکومت پر الزام لگاتے ہوئے پرینکا گاندھی نے کہا کہ بدعنوانی کے سمندر میں ڈوبی بی جے پی آج دنیا کی سب سے امیر پارٹی بن گئی ہے۔

اس نے یہاں تک پہنچنے کے لیے ہر غلط راستہ اختیار کیا ہے۔گجرات میں جس پل کے ٹوٹنے سے سینکڑوں لوگوں کی جانیں گئیں، بی جے پی نے اس کمپنی سے بھی چندہ لیا اور صرف مہلک Covidshield ویکسین بنانے والی کمپنی سے چندے کے لالچ میں پورے ملک کے ساتھ سودا کیا۔

پرینکا نے کہا وہ صرف اقتدار میں رہنے کے لیے کسی بھی حد تک جانے کو تیار ہیں، انتخابات سے عین قبل کانگریس کے کھاتوں کو منجمد کرنا اور عوام کے منتخب کردہ دو وزرائے اعلیٰ کو جیل بھیجنا اس کا منہ بولتا ثبوت ہے۔پرینکا گاندھی نے کہا کہ عوام کے تئیں حکومت کو جوابدہ ہونا چاہئے۔

آپ اور میں مل کر اور لڑ کر ہندوستان میں جمہوری اقدار کو دوبارہ قائم کریں گے۔ رائے بریلی کا الیکشن صرف ایک رسمی ہے! رائے بریلی کے عوام اپنے راہل گاندھی کو اتنی بڑی حمایت دینے جا رہے ہیں جس کی کوئی دوسری مثال نہیں ملے گی۔