ای پی ایف او ممبران کو 2025 سے اے ٹی ایم کے ذریعے پی ایف نکالنے کی سہولت ہوگی دستیاب

نئی دہلی: ملازمین کے پرووڈنٹ فنڈ (ای پی ایف او) کے 7 کروڑ سے زائد ممبران کے لیے خوشخبری ہے۔ ای پی ایف او نے اعلان کیا ہے کہ سال 2025 سے ممبران کو اپنے پی ایف کی رقم اے ٹی ایم کے ذریعے نکالنے کی سہولت فراہم کی جائے گی۔

اس حوالے سے لیبر اینڈ امپلائمنٹ سکریٹری سُمترا ڈاورا نے بتایا کہ ای پی ایف او کا آئی ٹی نظام جدید بنانے کا کام جاری ہے تاکہ کارکنوں کو بہتر سہولتیں فراہم کی جا سکیں۔

ڈاوڑا نے کہا کہ ’’ای پی ایف او کے آئی ٹی انفراسٹرکچر کو بینکنگ سسٹم کے مساوی سطح پر لانے کی کوششیں جاری ہیں۔ جنوری 2025 میں، ای پی ایف او کا نیا آئی ٹی ورژن 2.1 لانچ ہوگا، جس کے تحت ممبران اے ٹی ایم کے ذریعے پی ایف کی رقم نکال سکیں گے۔ اس سے دعووں کے عمل میں مزید تیزی اور خودکاریت آئے گی۔‘‘

ای پی ایف او کی جدید ٹیکنالوجی کے تحت غیر ضروری خانہ پری کو ختم کیا جا رہا ہے۔ حکومت اس بات کو یقینی بنانے کے لیے پرعزم ہے کہ ای پی ایف او خدمات کو زیادہ قابل رسائی اور زندگی کو آسان بنایا جا سکے۔ ایک نیا کارڈ بھی متعارف کیا جائے گا جو اے ٹی ایم کے ذریعے نکاسی کو ممکن بنائے گا۔ تاہم، پی ایف کی کل رقم کا صرف 50 فیصد نکالنے کی اجازت ہوگی۔

نکاسی کے موجودہ قوانین کے مطابق، نوکری جاری رہنے پر مکمل یا جزوی نکاسی ممکن نہیں۔ لیکن ایک مہینے کی بیروزگاری کے بعد 75 فیصد اور دو مہینے کے بعد مکمل رقم نکالنے کی اجازت ہے۔ حکومت کی اس پہل سے ملازمین کو مالی آزادی میں آسانی ہوگی اور زندگی کے معیار میں بہتری آئے گی۔