شاہ رخ خان کی فلم جوان کے سیٹ سے تصاویر شائع

ممبئی ۔ چار سال بعد شاہ رخ خان نے فلم پٹھان کے ذریعے پردے پر واپسی کی ہے۔ ان کی فلم کو نہ صرف اپنے ملک بلکہ بیرون ممالک میں بھی کافی کامیابی مل رہی ہے اور وہ بالی ووڈ کی بڑی فلموں میں داخل ہوچکی ہے۔ پٹھان کی بلاک بسٹر کامیابی کے بعد شاہ رخ سال 2023 میں دو اور فلمیں لانے والے ہیں، جو ‘جوان’ اور ڈنکی ہیں۔ ڈنکی سال 2023 کے آخری مہینے یعنی دسمبر میں ریلیز ہوگی، جب کہ فلم جوان جون میں پردے پرآئے گی۔

پٹھان کی ریلیز اور باکس آفس پر زبردست کامیابی کے بعد شاہ رخ خان اب جوان کی تیاریوں میں مصروف ہیں۔ رپورٹس میں بتایا جا رہا ہے کہ شاہ رخ نے ممبئی میں اپنی فلم کے آخری شیڈول کی شوٹنگ شروع کر دی ہے۔ اب اداکارکی سیٹ سے ایک تصویر سامنے آئی ہے۔ سوشل میڈیا پر شاہ رخ خان کی ایک تصویر منظر عام پر آئی ہے جس میں شاہ رخ لمبے بالوں میں نظر آ رہے ہیں۔ وہاں ان کے چہرے پر پٹی بندھی ہوئی ہے۔ اہم بات یہ ہے کہ جب شاہ رخ خان کا جوان سے پہلا روپ سامنے آیا تو وہ چہرے پر پٹی باندھے ہوئے ہی نظر آئے تھے ۔ تاہم شاہ رخ کی پٹھان سینما گھروں میں ریلیز ہو چکی ہے لیکن اس کے ساتھ ہی ان کے مداح نوجوان کا بے صبری سے انتظار کررہے ہیں۔ فلم جوان سے شاہ رخ کا پہلا لک سامنے آیا ہے، لوگ اس فلم کے لیے کافی پرجوش ہوگئے ہیں ۔ ساتھ ہی سیٹ سے سامنے آنے والی اس تصویر نے لوگوں کے تجسس کو اور بھی بڑھا دیا ہے۔ جنوبی ہندکی معروف اداکارہ نینتارا شاہ رخ خان کے ساتھ فلم جوان میں نظر آنے والی ہیں۔ ساتھ ہی اس فلم کو ساؤتھ سنیما کے مشہور ڈائریکٹر ایٹلی کمار ڈائریکٹ کر رہے ہیں۔ آپ کو بتاتے چلیں کہ ایٹلی حال ہی میں ایک بیٹے کے باپ بنے ہیں۔