دہلی میں صحت عامہ سے کھلواڑ! گھاس، گڑ اور پتھر سے ’نقلی زیرہ‘ بنانے کی فیکٹری کا پردہ فاش

دہلی پولیس نے گھاس، گڑ اور پتھر کے پاؤڈر سے نقلی زیرہ بنانے والی فیکٹری کا پردہ فاش کیا ہے۔ موقع سے 348 بوریاں زیرہ، 35 بوری گھاس، 25 بوری گڑ اور 25 بوری پتھر کا پاؤڈر برآمد کیا گیا ہے

نئی دہلی: دیوالی کا تہوار عنقریب ہے، جس کے پیش نظر ملاوٹ خور بھی لوگوں کی صحت سے کھلواڑ کرنے کے لئے سرگرم ہو گئے ہیں۔ اسی ضمن میں دہلی پولیس نے نقلی زیرہ بنانے والی فیکٹری کا پردہ فاش کیا ہے۔ دہلی پولیس نے کنجھوالا کے مدن پور روڈ پر نقلی زیرہ بنانے والی فیکٹری کا پردہ فاش کیا ہے اور اس میں استعمال ہونے والی اشیاء کی بڑی مقدار ضبط کی ہے۔

رپورٹ کے مطابق پولیس نے گھاس، گڑ اور پتھر کے پاؤڈر سے نقلی زیرہ تیار کرنے والی فیکٹری کا پردہ فاش کیا ہے۔ زیرے کی 348 بوریاں ٹرک سے اور 55 بوریاں گودام سے برآمد کی گئی ہیں، اس کے علاوہ 35 بوریاں گھاس، 25 بوری گڑ، 25 بوری پتھر کا پاؤڈر برآمد کیا ہے۔

قارئین کے لئے یہ جان لینا ضروری ہے کہ اصلی اور نقلی زیرے میں کیا فرق ہوتا ہے؟ زیرہ کو پہچاننے کے لیے ایک پیالے میں پانی لیں اور زیرہ ڈال کر چھوڑ دیں۔ اگر زیرہ رنگ چھوڑنے لگے اور ٹوٹنے لگے تو سمجھ لیں کہ یہ نقلی ہے۔ خیال رہے کہ اصلی زیرہ کو پانی میں ڈالنے سے اس میں کوئی تبدیلی نہیں آتی۔ اصلی زیرہ کو اس کی منفرد خوشبو سے بھی پہچانا جا سکتا ہے۔

نقلی زیرہ استعمال کرنا صحت کے لئے انتہائی مضر ہے۔ اس کے استعمال سے قوت مدافعت کمزور ہو سکتی ہے اور معدے سے متعلق کئی مسائل بھی پیدا ہو سکتے ہیں۔ نقلی زیرہ کھانے سے پتھری اور جلد کے مسائل کا بھی سامنا کر سکتے ہیں۔