پولیس نے دو شاطر بدمعاشوںکو گر فتار کیا

بارہ بنکی : گینگسٹر سمیت لوٹ ، چوری جیسی وارداتوں میں مطلوب دو ملزمین کو صفدر گنج پولیس نے غیر قانونی اسلحہ و چوری کی موٹر سائیکل کے ساتھ گرفتار کر لیا۔ پولیس لائن جلسہ گاہ میں ایس پی عبدالحمید نے پریس کانفرنس کے دوران اس کا انکشاف کیا۔

انہوں نے بتایا کہ مخبر کی اطلاع پر گزشتہ شب سی او صدر کی قیادت میں صفدر گنج پولیس نے گھیرا بندی کے ذریعہ پرسا تراہے پر بدو سرائے کوتوالی علاقہ کے روپ پور کے باشندے روہت ورما عرف نانو ولد بھگوتی و کوٹھی تھانے کے سردار گنج مزرعہ میرا پور کے باشندے رامو پاسی ولد رادھے شیام کو گرفتار کر لیا۔

جامہ تلاشی کے دوران لوٹا ہوا موبائل، موٹر سائیکل کے علاوہ غیر قانونی طمنچہ و کارتوس برآمد کیا۔ ایس پی نے بتایا کہ روہت کے خلاف تقریباً نصف درجن و رامو پاسی کے خلاف دس مقدمات درج ہیں۔ پولیس ٹیم میں شامل موہن ورما، نکشے دوبے، اجے سنگھ، محمد خالد و چندر بھان یادو کو نقد انعام دے کر نوازا گیا۔