پرینکا گاندھی نے لوک سبھا کی رکنیت کا حلف لیا، وائناڈ میں شاندار کامیابی کے بعد پہنچیں پارلیمنٹ

نئی دہلی: پرینکا گاندھی واڈرا نے آج جمعرات، 28 نومبر 2024 کو لوک سبھا کی رکنیت کا حلف لے لیا۔ لوک سبھا کی کارروائی شروع ہوتے ہی اسپیکر اوم برلا نے ان کا نام پکارا اور انہیں لوک سبھا کی رکنیت کا حلف دلایا گیا۔

قبل ازیں پرینکا گاندھی اپنی والدہ اور کانگریس پارلیمانی پارٹی کی لیڈر سونیا گاندھی اور راہل گاندھی کے ساتھ پارلیمنٹ ہاؤس کمپلیکس پہنچیں۔ بعد میں وہ راہل گاندھی کے ساتھ لوک سبھا گئیں جہاں انہیں ایوان کی رکنیت کا حلف دلایا گیا۔

کانگریس کی جنرل سکریٹری پرینکا گاندھی نے لوک سبھا کی رکنیت کا حلف لینے کے بعد کانگریس کے صدر ملکارجن کھڑگے سے ملاقات کی اور ان سے رہنمائی اور آشیرواد حاصل کیا۔ اس موقع پر راہل گاندھی کافی خوش نظر آئے اور انہوں اپنے موبائل پر اپنی بہن پرینکا گاندھی کی تصاویر بھی لیں۔

پرینکا گاندھی نے کیرالہ کے وائناڈ لوک سبھا سیٹ پر شاندار کامیابی حاصل کی تھی، جہاں انہوں نے 4 لاکھ سے زیادہ ووٹوں کے فرق سے سی پی آئی کے امیدوار ستین موکری کو شکست دی۔ وائناڈ میں یہ انتخاب کانگریس کے لیے ایک اہم فتح ثابت ہوا ہے، کیونکہ یہ سیٹ راہل گاندھی نے خالی کی تھی، جب انہوں نے 2024 کے عام انتخابات کے دوران اتر پردیش کے رائے بریلی سے بھی کامیابی حاصل کی اور وہاں سے استعفیٰ دے دیا تھا۔

پرینکا گاندھی کی پارلیمنٹ میں آمد ایک اہم موقع ہے، کیونکہ اس سے قبل وہ صرف پارٹی کی جنرل سیکریٹری کے طور پر سرگرم رہی تھیں لیکن اب وہ منتخب نمائندہ کے طور پر ایوان میں قدم رکھ رہی ہیں۔

پرینکا گاندھی کی کامیابی کا جشن پورے کانگریس کی صفوں میں منایا گیا اور انہیں پارٹی کے کئی رہنماؤں کی حمایت بھی حاصل ہوئی۔ ان کی اس کامیابی سے کانگریس کے لیے ایک نئی امید کی لہر پیدا ہوئی ہے، خصوصاً جب پارٹی ہریانہ اور مہاراشٹر میں حالیہ شکستوں کا سامنا کر رہی ہے۔